– Dál gal lea hui, hui buorre dovdu
Dajai Hans Ole Eira go gulai ahte son lea dán jagáš Sámi Grand Prix juoiganoasi vuoiti. Son juoiggai nieddas, Mina Helene.
Hans Ole Eira ribahii jo lávddi duohken golggihit gatnjala go gulai gii dán jagáš Sámi Grand Prixa juoiganoasi vuoiti lea.
Goasii njuorasmuvai ovdal go rohttestii vuoitoluođi
Mázelaš Hans Ole Eira searvvai njealját geardde Sámi Grand Prixii ja juoiggai iežas nubbin boarráseamos nieidda, Mina Helene Eira, guhte lea Amerihkás dál lonohallanstudeantan.
Hans Ole Eira logai iežas goasii njuorasmuvvan ovdal go rohttestii vuoitoluođi ođđasit.
– Lei sihke somá ja lossat oktanis go vuiten Mina luđiin, gii lea nu guhkkin eret mis juste dál. Mearkkašii hui olu, dadjá Eira.
Mina Helene oappát ja eadni muitalit ahte son lea geahččan áhčis juoigamin streamema bokte.
Njealját ja buoremus geardi
Eira ii loga iežas muitit ge goas maŋemus lea leamaš nu buorre dovdu go beassášlávvordaga lei.
– Na dál gal lea hui, hui buorre dovdu mus gal. Mun in dieđe goas mus lea maŋemus leamaš ná buorre dovdu. Dál lei njealját ja buoremus geardi go lean searvan, dadjá son.
Olmmoš gal álo sávvá vuoitit
Vaikko dan ii soaitte jitnosit dadjat, de gal olmmoš álo sávvá ahte vuoitá. Dan duođašta ge Hans Ole Eira.
– Ledjen sávvan ahte beasan dan golmma buoremusa searvái. Goalmmát sadji lei dán rádjái dat buoremus maid lean olahan Grand Prixas, ja nu go ovdal lean lohkan, de mus lea mihttu leamaš časkit dan, ja dál viimmat manai nu. Muhto olmmoš han gal álo sávvá vuoitit, boagusta son.
Mihttu bidjat luođi buot nieiddaide
Hans Oles leat njeallje nieidda, ja dál lea juoigan guoktása Grand Prix lávddis. Mihttu lea juoigat buot njealljása.
– Mun lean goit bidjan mihttun buohkaide bidjat luođi. Dieđusge jus daiguin beasašin vel Grand Prixii, na mii vel buoret. Mun áiggun goit sáddet sisa luđiid maŋit áiggi, goas dal de. Luođit aŋkke šaddet, mat bohtet goas dal de, dadjá son vel loahpas.
Nubbi ja goalmmát sadji
Juoiganoasi goalmmát sadjái lea jury mearridan Per Tor Turi. Nuppi sadjái Per Bueng.