Sámi beassážat leat erenoamážat
Dál leat dan jagáš beassážat meaddel. Lea dušše dan láhkái ahte Kárášjohka ja Guovdageaidnu leat sámi meassuid guovddáš beassážiid, ja nu lea leamaš don doloža rájes. Lea oainnat álot nu leamaš, ahte beassážiid leat sápmelaččat čoahkkanan dán guovtti báikái, sihke girkostallat ja messostallat. Ovddeš áiggi lei hui dábálaš mánáid risttašit ja bárat náitaledje beassážiid, vaikke dat árbevierut orrot dán áigge nohkamin. Dáid beassážiid ii náitalan okta ge párra Guovdageainnus dahje Kárášjogas, ja lea vissa logi jagi áigi go maŋemus lea geavvan dan láhkái. Aŋkke leat dán guovtti báikkis beassážat sámiid messostallanmárkanat. Dáid ge beassážiid leat nuorat konfirmerejuvvon ja ollu bearrašiin leat leamaš dasto konfirmašuvdnadoalut. Dat doalut dieđus čohkkejit fulkkiid ja olbmáid ovttastallamii, ja jáhkkit ge ahte konfirmašuvnnaid olis nannejuvvojit oktavuođat olbmuid gaskkas, go besset suohtastallat ovttas. Seammá láhkái go dološ áigge maiddái. Dat dieđus čatná fuolkevuođa báttiid čavgadit oktii, ja nu seailluhuvvo sámiid fuolkevuohta dehálažžan go fulkkežat besset deaivvadit dákkár dilálašvuođain.
Mii duođaid sávvat ahte olbmot leat muosáhan ollu suohttasit mannan beassášbasiid.
Sámi beassážiin dán guovtti báikkis lea eará erenoamášvuohta, mii ovddida ja nanne sámevuođa ja kultuvrra, namalassii gáktegeavaheapmi. Eat jáhke makkár ge eará doaluin oaidnit dán guovtti báikkis nu ollu gávttehasaid go beassážiid, ii fal ii Sámi álbmotbeaivvi ge. Juste dan dihte go beassášmárkanat čohkkejit eará guovllu sámiid maiddái messostallat ja čuovvut konsearttaid, ja nu leat ge eará guovllu gávttehasat maid oidnosis. Duostat ge dadjat, ahte beassášmárkanat lea dehálaččat maid sámevuođa ovddideamis, go dain márkaniin lea min iežamet kultuvrra nu guovddážis. Dasa lassin leat maiddái beassášmárkanat dakkár arenat gos luohti maiddái lea hui sadjosis, eai ge dáidde ge makkár ge doaluin nu ollu ođđa luođit ilbmat go beassášmárkaniin.
Mii duođaid sávvat ahte olbmot leat muosáhan ollu suohttasit mannan beassášbasiid. Ležžet dál leamaš konfirmašuvnnain, konsearttain dahje dušše návddašan dollagáttis luonddu. Otná aviissas beassat ge lohkat ságaid ja oaidnit govaid beassášmárkaniin, nu go skutergilvvuid, heargegilvvuid, konsearttaid ja diehttelasat Sámi Grand Prix juoiganja lávlungilvvu, mii eahpitkeahttá lea beassážiid stuorámus dáhpáhus Finnmárkku siseatnamis. Dan oaidnit juohke beassážiid jagi jagi maŋŋái, ahte das beroštit olbmot ja dan birra hupmet ja digaštallet. Dan ektui lea veahá imaš go Sámi Musihkkafestivála, mii eaiggáduššá Sámi Grand Prix, ii nákce dahje ii fuomáš hutkat juoidá ollu stuorábu daid doaluid birra. Muhto mot juo leaš, de aŋkke dat geasuha olbmuid. Jáhkkit maiddái dárbbu ahte dat guokte lágideaddji goabbat ge báikkis berrejit boahtteáiggis oažžut ollu stuorát ekonomalaš doarjagiid vai sámi deháleamos beassášmárkanat eai oalát stirddo, muhto baicce ovdánit buorebun ja stuorábun.