18 jagi jo illodahttán gáhkkováibmiliid, dál galgá «soahtat» gáhkuiguin
18 jagi jo illodahttán gáhkkováibmiliid,
– Go olmmoš bargá juoidá man ráhkista, de vajálduhttá visot eará mii das lahkosis orru vuorjame. Bártnáš bovttii miela searvat gilvui
Andersen liiko hui hui ládje gáhkket ja čilge ahte lei su bártnáš gii attii sutnje dan miela ahte gilvvohallat gáhkkemis.
– Lei muhtun eahket go bártnážiin leimme geahččame «Kakekrigen» TV:S 2016 čavčča. Mu bártnáš, nu go mun ge, liiko geahččat dan TVráiddu ja jearrala fáhkka mus «eadni, ii go dus leat miella searvat Kakekrigenii». Dalle dego fáhkka buoláskii mu siste ja jurdilin ahte juo, dan mus gal lea miella. Dalán go oidnen ahte sáhtii ohcat beassat mielde, de dahken dan, muitala Ann Sissel. Nu álggii ge su «Kakekrigen» vásáhus.
Hušša čavčča rájes
Ii mannan ge guhkes áigi ovdal go Ann Sisselii bođii diehtu ahte son lea okta sis gii lea beassan fárrui. – Go ringejedje muitalit ahte mun lean beassan mielde, de oaččut jáhkkit ahte njuikejin goasii dáhkkái, boagusta son.
Lei olu bargu ja hušša, ja čakčamánus álggii jo bádden. Ann Sisselis lei mátkkošteapmi.
Gáhkken jo lagabui guoktelogi jagi
Ann Sisselis lei njuoratmánná go liikogođii gáhkket.
– Mu nieiddaš lei dalle aiddo riegádan, ja dál lea jo 18-jahkásaš, nu ahte lean liikon gáhkket gáhkuid jo 18 jagi, dadjá son ja duođašta
ahte dá lea ain juoga masa liiko.
Álki vajálduhttit buot eará go bargá juoidá maid ráhkista
Go galgá šaddat buorre TV, de leat olu diŋggat mat galget leat sajis. Kámerat, kámeraolbmot, jietnaolbmot ja feara mii. Vaikko soite dat veahá hástalussan Ann Sisselii, de ii lohkan guhkes áiggi mannat
ovdal go ledje vajálduvvon. – Vuosttaš beaivvi gal lei veahá ártet. Lei hui olu mii galggai dáhpáhuvvat, measta beare olu. Muhto ii mannan gal guhkes áigi ovdal go vajálduvvojedje. Lea álki vajálduhttit diekkár diŋggaid go bargá juoidá maid ráhkista, gáhkke, čilge son.
– Leat go balus maid olbmot dadjet go oidnet du TV:S?
– Dan birra in leat dette nu olu jurddašan, in leat oba jurddašan ge dan birra ahte galgá TV:S oidnot. Dál lean easkka dáikkihan ahte dát han galgá TV:S oidnot fargga. Muhto vuordámušat gal eai dette leat, lean sihke balus ja illudan oaidnit maid čájehit TV:S, dadjá son loahpas.