KLOVNNAT movttiidahtte mánáid sámástit
Giron sámi teáhter lei boahtán Osloi Gïella čirkušain. Neavttár ja giellabargi Patricia Fjellgren muitala Gïella čirkuša prošeavtta ulbmil lea oažžut mánáid stohkosa bokte gullat sámegiela. Kampen skuvlla sámegielatluohká mánáid mielas lei hui suohtasis čájálmas ja bargobijut, masa besse searvat.
Sámegielat oahppit Kampen skuvllas Oslos ledje bovdejuvvon Sámi vissui geahččat ja vásihit Gïella čirkuš maid Giron teáhter lágidii. Mánát ledje sáhkki mii galgá dáhpáhuvvat dan nuppi lanjas ja nu vuorddašedje dassážii go sirkus álggii. Klovdna maid Siri Hamari nevttii, geasuhii mánáid latnjii gos sirkus galggai dáhpáhuvvat, doppe vurde neavttárat Patricia Fjellgren ja Elina Israelsson geasuhit mánáid Gïella čirkuš máilbmái. Sirkus geasuhii mánáid sin máilbmái, gos neavttárat geavahedje sámegiela ja rumašgiela suohtasis sirkusmáilmmis. Mánát reške ja maiddái oahpaheaddjit reške njálgát čájálmasas. Dát teáhterčájálmas ii leat dábálaš čájálmas, deike besse mánát searvat čájálmassii iežaset gielain ja lihkastagaiguin. Maŋŋá go čájálmas loahpahuvvui de lágiduvvojedje maiddái bargobijut gos mánát besse oahppat mo Hip Hop-dánssa dánsut, ja mo ráhkadit gonstošanspáppaid ja mo daiguin gonstošit.
Hui somá
Elise Anti Billington, lea farga 11 jagi boaris ja vázzá sámegielatluohkás Kampen skuvllas, su mielas lei hui somás čájálmas.
– Ledje hui olu suohttasat maid sii dahke, erenomážit sus geas lei rukses njunni, de in áibbas ádden maid hálai ja dat lei hui somá, muitala Elise.
Čájáhus heive sihke mánáide geat máhttet sámegiela ja geat eai máhte
Bente Aster bargá Kulturtanken Kulturskuvllaseahkas ja son bargá kulturárvvuin ja sámi kulturáŋgiruššamiin, dan vuođul lei su mielas miellagiddevaš boahtit Sámi vissui geahččat mo leat huksen Gïella čirkuša čájálmasa, mo doaimmahit bargobijuid ja mo lea heivehan čájáhusa Oslo sámi mánáide. Son muitala sii áigot doallat konferánssa Kárášjogas giđđat ja dohko galgá Patricia Fjellgren ja Åsa Simma boahtit muitalit Gïella čirkuša birra.
– Dat lei hui buorre áđđestallan čájálmas, gos ii dárbbaš áddet sámegiela, muhto dattetge liikká áddet mii lea sisdoallu čájálmasas. Mun gii in leat sápmelaš, de liikká geasuhii čájálmas mu. Mun jáhkán dát čájálmas čájeha ahte
galgá sáhttit geahččalit ja meaddádit gielain. Dát lea issoras fiinna vuohki mo čatná dáidaga, kultuvrra ja scena ovdanbuktima, gielain ja stohkosiiguin, mii geasuha sámegielat mánáid ja maiddái sin geat eai máhte sámegiela. Sii ožžot dan seamma vásáhusa dáinna čájálmasain ja dát čájálmas berre maiddái čájehuvvot guovlluin gos ii leat sámegiella, lohká Bente Aster.
Stoahkat ja gullat sámegiela
Giron sámi teáhter lea ožžon Dav- viriikalaš doarjaga doaimmahit Gïella čirkuš prošeavtta. Patricia Fjellgren lea giellabargi ja neavttár sirkusis, son muitala sirkus lea giellapedagogalaš prošeakta, gos stohket gielalaččat mánáiguin.
– Ulbmil lea ahte mánát galget beassat stohkosa bokte gullat sámegiela. Mii stoahkat rumašlaččat, dahkat akrobatihkaid ja gonstošat spáppaiguin. Dál mis lei dušše okta diibmu bargobijus, mis láve dábálaččat guokte diimmu ja dalle mii bargat eanet akrobatihkain, lohká Patricia.
Lihkostuvvan prošeakta
Son muitala sii leat johtán olu guovlluin Sámis, sihke Ruoŧas, Suomas ja Norggas. Oslo lea dat maŋimuš báiki giđđat gos čájehit čájálmasa.
– Dál nohká dát prošeakta ja dát lea leamaš diekkár metoda ovdáneapmi, muhto dat lea lihkostuvvan hirbmat bures. Maŋŋá go leimmet Stockholmmas, de čálii okta eadni munnje ahte su bárdni lea dál álgán sámástit dan maŋŋá. Mun jáhkán dat lea buorre go lea veaháš suohtastallan, veaháš moivi ja eai ge leat nie mo sámegielat diimmut skuvllas, lohká son.
Lihkadeames oahppá eanet
Son muitala min servodagas lea nu olu deaddu dan mentálalaš beallái.
– Dáinna Gïella čirkušin lea hirbmat buorre go bargat rumašlaččat ja gielain oktanaga, dat lea maid buorre vuohki oahppat. Olu dutkit lohket lea buorre rumašlaččat lihkadit, dáinna oahpat eanet, loahpaha Patricia Fjellgren.