Sátnejođiheaddji gudnejahtii joatkkaskuvlaohppiid
Sámi Joatkkaskuvlla Kárášjoga rektor ja Kárášjoga gielda ávvudedje Ungt Entreprenørskap (UE) vuitiid gáhkkofeasttain ja skeaŋkkaiguin joatkkaskuvllas.
Ungt Entreprenørskap (UE) (nuoraid fitnodathutkkus) lea riikaviidosaš organisašuvdna, mii bargá iešguđetlágan fitnodaga álggaheami oahpuin ja lágidit jahkásaččat fylkkameašttirgilvvuid nuoraide.
Buoremus fitnofágalaš fitnodaga suorggi vuittii Sámi Joatkkaskuvlla dearvvašvuođafága 1. luohká nuoraidfitnodat «Eallin Illu UB» ja besset ovddastit Finnmárkku Norggameašttirgilvvus cuoŋománus dán jagi. Buoremus vuovdisuorggis vuittii Sámi Joatkkaskuvlla Kárášjoga medialinjjá 1. luohká oahppi Anne Madeleine Eira Haetta, gii jođiha beaivválaččat nuoraid fitnodaga Sátniprint UB. Dát lea Sámi Joatkkaskuvlla Kárášjoga ja Kárášjoga gieldda mielas ánssášan veara ja nu lágiduvvui gáhkkofeasta dáid nuoraide gudnin mannan gaskavahku skuvlla boradanlanjas.
– Dát oahppit ánssášit dán gudni. Lea máilmmi somá sáddet ohppiid viidásabbot máilbmái nu go Norgga finálii Lillestrømii ja Kanadai, lohká rektor Synnøve Solbakken Härkönen.
– Dát gal lea illu Kárášjohkii ja min skuvlla ohppiide mat leat ná čeahpit. Guovtti jagi áigi vuite maid. Dál dat gal šaddagođii dego dáhpin dáppe, leaikkastallá Kárášjoga sátnejođiheaddji Svein Atle Somby ja lohká dat lea gudni skuvllaide.
Ánssášit duođaid gudni
Sámi Joatkkaskuvlla Kárášjoga rektor Synnøve Solbakken Härkönen rábmui skuvlla ohppiid gáhkkofeastta dilálašvuođas ja loahpas geigii son juohkehažžii glássakuvlla man Tonje Tunold lea ráhkadan skuvlii.
– Dán glássakuvlla addit mii ohppiide geat dahket juoidá erenoamáža ja nu ánssášit skeaŋkka. Mun in jáhke leat nu álkin vuoitit Ungt Entreprenørskap go lea olu gilvaleaddjit geat gilvalit fylkka finálas. Ferte lohkat sii leat duođaid buori barggu dahkan, lohká rektor Synnøve Solbakken Härkönen.
Illun Kárášjohkii
Kárášjoga sátnejođiheaddji Svein Atle Somby illuda ja muitala moji ahte Sámi Joatkkaskuvlla Kárášjoga oahppit leat vuoitán máŋgii dáid gilvvuid maŋimuš jagiid.
– Kárášjogas lea dárbu olu
priváhta fitnodagaide, muitalii son rábmonsártnis nuoraide.
Sátnejođiheaddji Svein Atle Somby čilgii nuoraide mo sii sáhttet oažžut veahki Kárášjogas, jus háliidit álggahit fitnodaga. Muitalii gielddas gávdnojit doarjjaortnegat nuorra olbmuide jus háliidit álggahit fitnodaga. Fárus dáid doaluide lei sus seahka dievva buvkkut maid son skeŋkii nuoraid fitnodaga «Eallin Illu UB» gollevuitiide ja buoremus vuovdái Anne Madeleine Eira Haettai.
Vuite golli ja NM saji
«Eallin Illu UB» fitnodagas leat Anna Nedrejord (17 jagi), Sáve Guttorm Eriksen (17 jagi, Tia Farvelund (17 jagi), Katrine Nilsen (16 jagi), Lina Therese Eira (16 jagi), Haakon Tverfjell (21 jagi) ja John Martin Andersen (19 jagi). Jođiheaddji Anna Nedrejord muitala sii mearridedje čakčat ahte háliidit fállat nuoraide ja boaresolbmuide eallima ilu. Sii lágidit doaluid ja fállet iešguđetlágan veahki olbmuide, nu go muohttaga čorget ja muoraid guoddit.
– Lea mannan hui bures, muhto leat leamaš hástalusat. Dál beassat mii vásihit mo lea jođihit fitnodaga. Mii loahpahat várra dán fitnodaga giđđat. Lillestrøm gilvui fertet velá čálistit giehtačállosa mas muitalat fitnodaga birra. Áiggun muitalit mii čuvget nuoraid ja boarrásiid beivviid, muitala jođiheaddji Anna Nedrejord.
Vaikko nubbijođiheaddji Sáve Guttorm Eriksen mielas leamaš hui somá bargat, de ii jáhke iežas bargagoahtit fitnodagain go lea hirbmat olu báberbargu dušše
álggahit fitnodaga. Oahpaheaddji Liss Utsi muitala nuoraidfitnodaga fágas jukset nuorat gelbbolašvuođa ulbmila buot fágain ja nu movttiidahttet nuoraid joatkit skuvllaid.
Nanne sámegiela gálvvuin
17-jahkásaš Guovdageainnu nieida Anne Madeleine Eira Haetta, gii dál vázzá Sámi Joatkkaskuvllas Kárášjogas, lea hirpmahuhttán oahpaheaddji go lea leamaš nu čeahppi ákkastallat ja jođihit iežaset nuoraidfitnodaga Sátniprint UB. Dán fitnodagas lea golbma oahppi, ieš Anne Madeleine ja velá Ida Alice Guttorm (17 jagi) ja Karine Emilie Negård gii duššai skohterlihkohisvuođas mannan mánus.
– Ulbmil dáinna fitnodagain lea nannet ja čájehit sámegiela. Dan čalmmustahttit ge sámi grammatihka kohpaid prentemiin. Kohpaid geavaha dávjá ja nu šaddá álkibun muitit, čilge son.
Dássážii lea son vuovdán 90 kohpa ja maŋŋá go fálai kohpaid Facebook neahttasiiddus, de šattai hirbmat digaštallan, leat go bárrastávval-, bárahisstávval- ja kontrakšuvdnavearbbat rivttes láhkai sojahuvvon ja velá kasusnamahusaid.
– Lea njeallje iešguđetlágan gohpu. Lea dovddus ahte sámegiella lea áitojuvvon giella ja dovdu ahte lea dárbu dákkár gohpuide. Olbmot eai soaitte muitit buot duoid kásusiid dehe mo rivttes láhkai sojahit sániid. Gohppu lea juoga man olmmoš dárbbaha, oaidná dan hui dávjá ja šaddá várra álkibun muitigoahtit mo sojahit, lohká Anne Madeleine Eira Haetta ja mieđiha ahte muhtumin lea son ge rahčan sátnegeavahemiin.