– Vuogas go lea vuodjinkoarta
Johttofatnasis gáibiduvvo vuodjinkoarta
Čávžu Safari fitnodat mielas lea vuogas ahte gáibiduvvo sierra vuodjinkorta go fievrrida eambbo go 12 olbmo fatnasis, muhto lohká njuolggadusat livčče galgan heivehuvvot johkafatnasii.
Mearrajohtolatdirektoráhtta lea sádden čielggadanreivve gielddaide ja fylkkagielddaide, mas deattuhit makkár gáibádusat leat vuodjinkoarttas go galgá fievrridit olbmuid fatnasiin, dás lea sáhka fatnasis masa čáhket eambbo go 12 olbmo.
Čávžu Safari fitnodat fállá johkafanasmátkkiid ja sin fatnasiidda čáhket eambbo go 12 olbmo, nu gáibiduvvo vuoddjis vuodjinkoarta. Čávžu Safari johkafanasmátkkiid ovddasvástideaddji Johan Eira lohká sis lea vuodjinkoarta mii gáibiduvvo, ja su mielas lea vuogas ahte lea dakkár gáibádus.
– Gáibádus lea áibbas ortnegis, muhto smiehtan ahte Mearrajohtolatdirektoráhtta váldá vuođđun meara ja lea huksen njuolggadusaid dan vuođul. Dieđus mearranjuolggadusat eai leat heivehuv- von Kárášjohkii ja min etnui, go mis eai gávdno ovdamearka dihtii bárut, dadjá son.
Johkafanas sáhttoskipan
Mearrajohtolatdirektoráhtta čállá ahte iešguđet ovttastusas sáhttet čuožžilit dárbbut ahte gielddat ja fylkkagielddat dárbbašit bálvalusaid mas fievrridit olbmuid skiippain. Mearrajohtolatdirektoráhtta oaidná dárbbu čielggadit makkár gáibádusat gusket skiippa vuodjinlohpái, nu ahte rivttes gáibádusat leat vuođđun vuodjinkortii go skiippa geavaha fievrridanbálvalussan.
– Buot skiippat, dán oktavuo- đas maiddái johkafatnasat, mat sáhttet fievrridit eambbo go 12 olbmo, leat sáhttoskiippat ja dasa gáibiduvvo vuodjinkoarta mii addá lobi fievrridit olbmuid, čállá Mearrajohtolatdirektoráhtta.
Áigi ráhkadit sierra njuolggadusaid
Johan Eira mielas livččii áigi rievdadit ja ráhkadit sierra njuolggadusaid johkafatnasiidda, muhto muđuid rámida son vuodjinkoartagáibádusa ja lohká ahte erenomáš sihkarvuođakursa lea hui dehálaš.
– Go olbmuid sertifisere gal lea vuogas, čađahit sihkarvuođakurssa ja nu kvalifiseret iežas buktaga, dadjá son. Vaikko lohká oalle hárve ahte sii oidnet eará fatnasiid, de lea mávssolaš oahppu čađahit kurssaid.
Sertifiseremin ođđa olbmuid
Čávžu Safari lea dál ođđa olbmuid maid sertifiseremin.
– In jáhke mii dárbbašat ballat eará fatnasiid deaivamis ja guhkkin eret báruin ballat, lohká son. Čávžu Safaris lea vuodjinlohpi vuodjit dihto sajis Mázes Čávžui.