380 skohtera dárkkistuvvon beassážiid
FINNMÁRKU: Boazopolitiijat leat čađahan skohterdárkkistemiid áigodagas njukčamánu 23. beaivvis cuoŋománu 2. beaivvi rádjái ovttas báikkálaš politiijaiguin ja SNO:IN dáid gielddain: Ráissas, Álttás, Porsáŋggus, Kárášjogas, Deanus, Čáhcesullos, Girkonjárggas ja Láhpis. Oktiibuot 380 skohtervuoddji dárkkistuvvojedje áigodagas, čállet boazopolitiijat preassadieđáhusas.
Váidon
18:s váidojedje go ledje vuodján olggobealde merkejuvvon luottaid, diimmá lohku lei 32. Okta lea váidon go galgá leat báhtaran politiijain, guovttis váiduiga diibmá. Čiežas ožžo álkiduvvon sáhku, diibmá ovccis sáhkkohalle seamma áigodagas. Sivat manin ožžo álkes sáhku leat: Váilevaš dovdomearka vuojánis (njealjis sáhkohalle), guovttis sáhkkohalle go lei beare stuorra guorbmi. Okta vuolleahkásaš sáhkkohalai go ii lean suodjegahpir.
29 olbmo sáhkkohalle
Diibmá sáhkkohalle 11:s go váilo dokumeanttat ja go ii lean suodjegahpir, dán jagi ožžo 29:s seammalágan sáhkku. Guovttis go váilo dokumeanttat ja 27:s go eai geavahan suodjegahpira.
Váilevaš dáhkádus
Lassin dáid áššiide, de válde politiijat ovtta skohteris dovdomearkka go ii lean dáhkádus, okta skohter galgá ges leat bearehaga trimmejuvvon ja lea dieđihuvvon Stáhta geaidnodoaimmahahkii dárkkistuvvot.
Eambbosat sáhkkohalle dán jagi
Boazopolitiijet čállet ahte diibmá dárkkistedje 715 skohtervuoddji, dán jagi sáhkkohalle mealgat eambbosat go vudje suodjegahpira haga, diibmá sáhkkohalle «dušše» 11 olbmo, dán jagi 28, okta sis lei vuolleahkásaš. Heajos dálkki geažil eai beassan politiijat čađahit buot plánejuvvon dárkkistemiid.