Sávvá Wara leat boazodoalu jietnan ráđđehusas
Gaskavahku nammaduvvui 53-jahkásaš Tor Mikkel Wara, guhte lea Kárášjogas eret, Norgga ođđa justiisaministtarin. Dát leat boktán vuordámušaid Sámis.
Tor Mikkel Wara váldá badjelasas dán ámmáha maŋŋe go Sylvi Listhaug geassádii gieskat. Wara lea bargan PR- ja gulahallansuorggis moanat jagiid ja boahtá ge First House fitnodagas, gos maiddái Listhaug barggai ovdal. Wara lea maid Finnmark Rein stivrajođiheaddji, ja eaiggáduššá maid ossosiid seamma fitnodagas Rein Holding ja Vaara AS bokte, čállá VG. Son dattetge lea dieđihan ahte geassáda dáin ámmáhiin garvin dihte hástalusaid boahtteáiggis, go dál šaddá ge maid boazopolitiijaid bajimus hoavdan.
Sávvá Wara leat boazodoalu jietnan
Finnmárkkus leat olu reakšuvnnat dasa go Wara lea nammaduvvon ođđa stáhtaráđđin, olusiin orru doaivva ahte das lea ávki earret eará boazodollui ja sámi áššiide muđuid ge. Norgga Boazosápmelaččaid Riikkasearvvi jođiheaddji Ellinor Marita Jåma lea okta dain geain orru maid doaivva vuhttomin ođđa ministarii.
– Dieđán bures gii Wara lea Finnmark Rein bokte ja sávan ahte son dahká buori barggu ráđđehusas sihke sámeáššiid dáfus, muhto maiddái boazodoalloáššiid dáfus. Sus han lea olu máhttu boazodoalloáššiin ja sámeáššiin muđuid, lohká Jåma ja sávvá Wara geavahit dan ávkin ráđđehusas. Norggabeale boazodoallit leat guhkit áigge háliidan boazodoallolága rievdaduvvot, ja muhtimat soitet ge doaivut ahte dál lea stuorát vejolašvuohta dasa go Wara lea justiisaministtar. Jåma ii leat nu sihkar váikkuha go ođđa ministtar dan prosessii:
– Muhto sávan son sáhttá leat ávkin ráđđehusas dainna máhtuin mii sus lea boazodoalu hárrái, ahte son sáhttá lea boazodoalu jietna ráđđehusas siskkáldasat ja nu nagodivččii loktet dehálaš boazodoalloáššiid.
Áigu váldit oktavuođa
Jåma gal lohká iežas áigut váldit oktavuođa Warain.
– Lea dehálaš doallat oktavuođa buot departemeanttaiguin main lea dakkár ovddasvástádus mii sáhttá midjiide maid ávkin.
Vuordá oaidnit
Sámediggeráđđi Silje Karine Muotka, geas lea ovddasvástádus earret eará boazodoalloáššiid ovddas, dattetge ii leat gal vuos nu sihkar makkár mearkkašupmi ođđa ministaris šaddá.
– Mun lean diehttelasat deaivvadan Tor Mikkel Warain ovdal ja čuvvon su karrieara. Sus lea gelbbolašvuohta Finnmárkku birra ja boazodoalu birra Finnmark Rein bokte. Dasa lassin lea son hárjánan gulahallanolmmoš ja dovdá maid politihka. Su hálddus leat olu dehálaš sámi áššit maid, nu go Sámi vuoigatvuohtalávdegotti čuovvoleapmi, nu ahte lea miellagiddevaš oaidnit su barggu, lohká Muotka.
Muotka maid lohká Waras leat eambbo gelbbolašvuođa Finnmárkku ja boazodoalu birra go olu earáin.
– Finnmark Rein bokte han son lea maid čuvvon ealáhusa ovdáneami ja márkanastima ja diehtá man dehálaš dat lea. Juste dat go sus lea gelbbolašvuohta sáhttá leat buorre, muhto in dieđe mo geavaha iežas vásáhusaid politihkas, lohká son.
– Boazodoalloláhka ain Dale duohken
Ii Muotka ge guorras dan doaivagii ahte Wara dal váikkuhivččii nu olu boazodoallolága rievdadeapmái.
– Boazodoallolága rievdadeapmi gal lea Jon Georg Dale ja Eanandoallodepartemeantta duohken, nu ahte in leat sihkar váikkuha go dat go mis lea ođđa justiisaministtar gal nu sakka dasa, dadjá son.
Muotka dattetge oaivvilda leat buorrin go Waras lea fierpmádat maiddái boazodoalus.
– Sus lea lunddolaš gulahallan ealáhusain ja earáiguin, ja dat han gal ain čuovvu vaikke dál leage ođđa rollas, oaivvilda Muotka, guhte ii jáhke gal Waras oaidnit radikála ođđa politihka ráđđehusa ektui.
– Justiisadepartemeanta dábálaččat ii leat gal dakkár departemeanta gos bohtet olu ođđa jurdagat, ja mun jáhkán Wara gal lea hui oskkáldas ráđđehusa politihkkii. In jáhke radikála ođđa politihkalaš bálgá gal oaidnit, oaivvilda sámediggeráđđi.