SÁNAG veahkeha «ADHD OMEGA 3» dutkosa čađaheapmái
SÁNAG Mánáid- ja nuoraidpsykiatriija poliklinihkka veahkeha čađahit dutkosa «ADHD OMEGA 3». Dutkosa ulbmil lea guorahallat váikkuha go omega-3 ADHD ja ADD dovdomearkkaide, čállá SÁNAG preassadieđáhusas.
Omega-3 lea biebmanlasáhus mas lea buoidesivra. Ovdamearkka dihte lea guolis ja bohccobierggus omega-3.
– Omega-3 lea dárbbašlaš jierbmái ja dan ovdánahttimii ja lea maid dehálaš eastadan dihte váibmo-/varrasuotnadávddaid, muitala stipendiáhtta ja váldodoavttir Judeson Joseph preassadieđáhusas. Hearkkes mánát, nu go mánát mat leat beare árrat šaddan dahje unna mánát riegádanagi ektui, dárbbašit lassibiepmu mas lea omega-3, vai buorida jierpmi šaddama.
– Mii diehtit ahte stuorra oassi mánáin geain lea ADHD lea unnán omega-3 rupmašis. Dasa mii eat dieđe riekta vástádusa. Leage justa danin go mii dál háliidat dutkat dan birra. Leat ovdalaččas dahkkon dutkosat, muhto eai leat leamašan ná stuorrát ja viidát, čilge Joseph.
Joseph lohká ahte omega-3 lea dehálaš jierpmi ovdánahttimii ja doibmii. Ja ADHD /ADD fas lea muhtinlágan muosáhus jierpmi ovdánahttimis ja funkšuvnnas. Dát dutkkus dáhttu ge gávnnahit sáhtášii go omega-3 unnidit ADHD/ADD dovdomearkkaid mánáin ja nuorain geat eai váldde dálkasiid.
SÁNAG Kárášjohka šaddá dutkanguovddáš
Davvi Dearvvašvuohta lea ruhtadan prošeavtta ja dat mielddisbuktá ahte dutkagohtet DavviNorgga álbmoga. Joseph háliida liikká deattuhit ahte dutkkus lea maiddái rabas earáide Norggas, geat háliidit searvat dasa.
UNN lea váldosponsor ja danin leage Romsii ásahuvvon vuosttaš dutkanguovddáš. Prošeakta ásaha dutkanguovddáža Nordlándii ja Finnmárkui maid. Guovddážat šaddet Bådåddjoi ja Kárášjohkii.
Diđoštallanmátkkis Kárášjogas
Stipendiáhtta Judeson Joseph lea fitnan dán vahku diđoštallanmátkkis Kárášjogas ovttas dutkanbuohccidivššáriin Kristin Jensseniin ja prošeaktajođiheddjiin professor Siv Kvernmoin. Diđoštallanmátkkis fitne oahpásmuvvan ja oaidnin dihte mo SÁNAG:S doaibmá dat klinihkalaš árgabeaivi, muitala Kvernmo.
– Mii beassat oaidnit mo dáppe lea ja gullat makkár rutiinnat leat ovdamearkka dihte vai diehtit makkár dutkanrusttegiid galgat deike háhkat. Dáinna lágiin beassat mii ráhkkanit ásaheapmái mii doaivumis dáhpáhuvvá maŋŋil geasseluomu, muitala Kvernmo preassadieđáhusas.