Gávnnai heastaoaivvi oktan bákkiin
Sandra (18) healkkehii go lei iežas heastta hárjehallame
Kárášjoga nieida Sandra Bueng Hansen (18) healkkehii go gávnnai heastabázahusaid ja heastta oaivvi oktan bákkiin luoddaguoras, gos lei hárjehallame iežas heastta.
Nuorra Kárášjoga nieida Sandra Bueng Hansen lei hárjehallamin iežas heastta go son ja su áhčči, gii lei mielde, fuobmáiga bázahusaid mat ledje luoddaguoras Báhkilskáiddis Kárášjogas. 18-jahkásaš Sandra muitala álggos gáttiiga muhtin lea dolvon bázahusaid bohccos, muhto go jorggiheigga fas meaddil bázahusaid, de oinniiga ahte dát eai leat bohcco bázahusat, nu ahte soai bisáneigga guorahallat daid. Dan maid Sandra oinnii dalle, suorggahahtii su, go bázahusaid maid lei gávdnan, ledje heastabázahusat. Heastta oaivvis mii lei luoddaguoras lei ain bággi.
– Mu mielas lei hui unohas, go mun ledjen das iežan heasttain hárjehallamin ja ráhkkaneamen gilvvuide. Go oidnen jápmán heastta dies gos hárjehalan, de gal ii šaddan nu miella dieppe šat hárjehallat heasttain, lohká Sandra.
Heastabázahusat
Son muitala heastabázahusaid maid lea gávdnan, čájehuvvo ahte heastta leat njuovvan ja luoddagurrii leat vel báhcán bázahusat.
– Doppe lea dušše dat oaivi, šuovka ja hárji. Čoddagis oaidná ahte lea čuhppojuvvon ja mun in sáhttán oaidnit ahte heasta lea báhččon boaltabissuin, nu ahte in dieđe mo leat heastta heakkahuhttán, go ii dovdo leat boltejuvvon. Čeabáha ja guolgga mii lea čoavjji vuolde, ovdajuolggit ja heastacilli leat maid leat guođđán diesa, dadjá son.
Olmmoš gii atná árvvus heastta, son jávkada heastta njuolggadusaid mielde
Son muitala dábálaččat go heakkahuhttet heastta, de dolvot heastta albma ja lobálaš sadjái.
– Orro leamen lobihuššan go ii oidno ahte heasta lea boltejuvvon. Mun jurddašan jus lea šibitdoavttir gii heakkahuhttá heastta, ii dalle gal guođe heastabázahusaid geaidnogurrii, lohká son. Go heastta heakkahuhttá de lea dábálaš doalvut jápmán heastta ruskačorgenfitnodagaide dahje jávistit dan eatnama vuollái, lohká Sandra Bueng Hansen
Ii lean čihkkon
Son jáhkká heastabázahusaid leat guođđán dasa badjelaš vahkku áigi, son lohká go son ja su áhčči gávnnaiga bázahusaid, de eai lean lottit ollen gaikkodit bázahusaid ja son jáhkká dalle ii sáhte nu áigá bázahusat bálkestuvvon luoddagurrii.
– Dat ferte leat oalle easka geavvan, go ii lean gaikkoduvvon ja ii ge lean álgán guohcagit. Ii heasta ge orron čihkkon, go dat lei njuolgga dies luoddaguoras ja dušše bálkestuvvon justa badjel dan muohtaskálvvi, lohká Bueng Hansen.
Áddetmeahttun
Son muitala sajis gos hárjehallá iežas heasttain, doppe oidnojit heastaluottat ja son jurddaša ii go son dat olmmoš gii lea guođđán dáid bázahusaid, oainne ahte dakko hárjehallet olbmot iežaset heasttaiguin.
– Munnje lea áibbas áddetmeahttun ahte dieppe gávdnojedje heastabázahusat. Mun dovddan hui olu dain heasttain mat leat Kárášjogas. Mu mielas gal ii oro dát okta Kárášjoga heasttain, go in nagot dovdat dán heastta, dadjá Sandra Bueng Hansen.
Ii oktage dieđe
Son muitala sii leat viggan ohcat jápmán heastta eaiggáda. Son muitala sii leat riŋgestallan olbmuide geat barget heasttaiguin.
– Ii oktage oro diehtimin gean heasta dát leamaš. Dat lea hui ártet, go ii oktage dieđe gean heasta leamaš, ja gosa dat gullá, muhto liikká lea dušše ihttán dasa, ja ii oktage dieđe dan birra maidige, lohká son.
Váivi su niidii
Sandra eadni, Unn Renate Bueng, lohká su niidii lea dát dieđus hui váivi, oaidnit heastabázahusaid, go son han hárjehallá heasttaid justa dien báikkis gos bázahusat leat gávdnon.
– Jus lea nie ahte muhtun lea beare bálkestan bázahusaid diesa, de gal livčče mu sávaldat ahte olbmot sáhtašit jávistit bázahusaid juoba eatnama vuollái, ja iige nie beare šlivget, deattuha son.