Ráđđehus juolluda 1,5 miljovnna ruvnno Sámi valáštallamii
Sámediggeráđđelahttu Henrik Olsen illuda go sámi árbevirolaš valáštallan oažžu ráđđehusas beali eambbo ruđaid go dan maid lea maŋimuš logi jagi ožžon.
Ráđđehus juolluda beannot miljovnna speallanruđaiguin sámi valáštallamii jagi 2018:s, dieđiha kulturdepartemeanta. Ruhtasupmi lea beali eambbo go dat mii juolluduvvui diibmá, jagi 2017.
– Árbevirolaš sámi valáštallansuorggit leat njunnošis dálá áiggi sámi kultuvrras. Lean ilus go ráđđehus dán jagi addá beali eambbo ruđaid speallanruđaiguin sámi valáštallamii. Dáinna vugiin háliidat mii čielgasit dieđihit Sámediggái ahte mii vuoruhat sámi kultuvrra áimmahuššama, lohká kulturministtar Trine Skei Grande (gurotbellodat) preassadieđáhusas. Speallanruhtaruittus lea 2824,8 miljovnna kruvnna mas kulturministtar Trine Skei Grande lea juolludan 1,5 miljovnna kruvnna sámi valáštallamii.
– Ii leat olu ruhta, muhto sámi valáštallamii lea dat ollu, go addet beali eambbo go dan maid lea dahkan maŋimuš jagiid. Dat mearkkaša olu dáid smávva valáštallansurggiide, lohká Sámediggeráđđi Henrik Olsen.
Dáhtton máŋga jagi ruđaid sámi valáštallamii
Ráđđehus juolluda jahkásaččat speallanruđain valáštallanruđaid Sámediggái. Árbevirolaš sámi valáštallan lea golmma oasis: heargevuodjin, čuoigan oktan njoarostemiin (dálvit) ja viehkan meahcis njoarostemiin ja njoarosteami haga (geassit).
Sámediggeráđđi Henrik Olsen lohká dát ruhtajuolludeapmi mearkkaša ahte Sámediggi sáhttá eambbo ruđaid juolludit sámi árbevirolaš valáštallansurggiide.
– Mii leat hirbmat duhtavaččat juolludemiin, go Sámediggi ii leat ožžon eambbo go 750.000 kruvnna maŋimuš čieža gávcci jagi. Mii leat guhká sávvan ahte dát supmi galggašii lasihuvvot. Illudan go kulturdepartemeanta dál juolluda eambbo ruđaid sámi árbevirolaš valáštallamiidda, masa mii juolludat ruđaid, čilge Sámediggeráđđi Henrik Olsen.
Olu hástalusat
Su mielas lea dát illudahtti go sii sáhttet dál juolludit beali eambbo ruđaid Sámiid Valáštallan Lihttui (SVL), vai sámi árbevirolaš valáštallan sáhttá nannejuvvot ja ahtanuššat.
– Mii diehtit earret eará hearge- vuodjimis lea stuorra hástalusat háhkat sihke ođđa kuskkaid ja herggiid. Dál sáhttit mii veahkehit heargevuoddjiidsearvvi, vai sáhttet oahpahit ođđa kuskkaid ja lágidit hárjehallandeaivvademiid. Lea dehálaš oažžut eanet nuoraid vuodjigoahtit herggiiguin, joatká Sámediggeráđđi Henrik Olsen.
Máŋga jagi bušeahtas
Kulturministtar Trine Skei Grande galledii Sámedikki njukčamánus. Sámediggeráđđi Henrik Olsen muitala sii dalle háleštedje earret eará sámi valáštallama hástalusaid birra.
– Fáddá dalle lei, ii got livčče vejolaš lasihit ruhtadoarjaga sámi valáštallamii, go dat ruhtasupmi ii leat lassánan jagis jahkái nu mo eará surggiin, lohká Sámediggeráđđi Henrik Olsen.
Muitala Sámediggi lea dan dárbbu čalmmustahttán go lea sádden bušeahttadárbbu ráđđehussii. Lohká su mielas lea dál ráđđehus beroštišgoahtán sámi dáidagis, valáštallamis ja kultuvrras.
– Dan oaidnit maid boahttevaš kulturdieđáhusa barggus, masa lea ásahan sierra lávdegotti, mii galgá guorahit mo nationála ásahusat fuolahit sámi áššiid. Lea illudahtti go juolludit ruđaiguin maid, eai dušše sániiguin, loahpaha Sámediggeráđđi Henrik Olsen.