– Sápmelaččat EAI DÁRBBAT BALLAT ovttastahttimis Romssain
Finnmárkku ovddeš fylkkadiggeáirras jáhkká sápmelaččaide Finnmárkkus arvat buoret dili šaddat jus Finnmárkku ja Romssa fylkkat ovddastahttojit. Dan son diehtá bures go lea viggan bargat áššiiguin mat gusket Sis-finnmárkui, muhto dasa ii lean beare olu doa
Bargiidbellodaga ovddeš fylkkadiggeáirasis, Nils Johan J. Gaupas, lea čielga oaivil fylkkaid ovttastahttima dáfus.
– Mii sápmelaččat eat dárbbat čierrut Finnmárkku fylkka ovddas. Mun jáhkán midjiide gal šaddá nu olu buoret Romssain ovddastahttot, buoret goit go ain bissut Finnmárkun. Mis leat joatkkaskuvllat ja ollu stáhta bargosajit Guovdageainnus ja Kárášjogas, lohká son.
Váttis bargu
Gaup gal diehtá dan birra bures, go son lea leamaš fylkadeaggeáirras guokte áigodaga, 2003:s gitta 2011 rádjái. Son muitala váttis bargodili alddis leamaš go lei dadjat veadjemeahttun áššiid oažžut čađa Fylkadikkis mat gusket Sis-finnmárkui.
– Mii leimmet nu moattis doppe, ja lei issoras váttis oažžut doarjaga áššiide mat guske nu go SisFinnmárkui. Ledjen evttohan mátkkoštanealáhusprošeavtta, mas galggai Sis-finnmárkku infrastruktuvrra buoridit. Eai turisttat vuolgge Álttás vuodjit biillain Guovdageidnui. Ledjen evttohan girdišilju, muhto dasa lei veadjemeahttun oažžut doarjaga, muitala son.
Aivve mearragáddái
Gaup namuha ahte leat measta juohke smávit báikkážis mearragáttis girdišiljut. Son lohká doppe leat cruise-fatnasat, eará fatnasat, bussefálaldagat, ja Sis-finnmárkkus ii mihkke.
– Dáppe šaddá bussiin dahkat šiehtadusa jus galgá bussiin vánddardit Guovdageainnus Kárášjohkii. Jus girdiin galgá vánddardit, de ferte biillain vuodjit diibmoviissaid vuos.
– Ja riikageaidnu gaskal Gievdneguoikka ja Kárášjoga, dat galggašii 7,5 mehtera govddu, muhto dat lea ain dál dego gearroluodda, lohká son.
Sámedikkis stuorit rolla
Gaup maid jáhkká ahte go Romsa ja Finnmárku ovttastahttojit, de oažžu Sámediggi olu stuorit rolla go dál lea.
– Sámediggi boahtá nanusmuvvat ja jáhkán oažžut stuorit rolla dan ođđa fylkkas. Sii fertejit maid ođasmahttit iežaset válgabiirriid mii heive ođđa organiseremii, go dálá válgabiireortnet ii leat buorre, lohká Gaup.
Doarju Gaupa
Sámeálbmot Bellodaga ovddeš fylkkadiggeáirras, Klemet Erland Haetta, duođašta Nils Johan J. Gaupa oainnu.
– Na mus lea seamma oaidnu go Gaupas, ii vearrát goit šatta jus Finnmárku ovttastahtto Romssain, lohká son.
– Dat mii mu mielas beahttá buot eanemus, dat lea go de oažžut doarjaga mearrádusaide, de eai čuovvoluvvo dat mearrádusat, lohká son.
Girdišillju
Haetta váldá ovtta čielga ovdamearkka: Girdišillju Guovdageidnui.
– Mun in oba dieđe ge man ollu mearrádusat dan áššis leat dahkkon, muhto dat eai šat čuovvoluvvo doppe. Mearrádus dahkko, muhto das ii šat ovdán ášši, lohká son.
– Jus geahččat našunála johto- latplána maid. Galle mehtera asfálta lea vuoruhuvvon Sis-finnmárkui? Gal dat eai leat galle mehtera. Mu vásáhus gal lea ahte dát guovllut vajálduvvet oalát Fylkadikkis, lohká son.
Ávvir ii lihkostuvvan oažžut oktavuođa Finnmárkku fylkkasátnejođiheddjiin, Ragnhild Vassvikain, ovdal go ášši deaddiluvvui.