Sámi gáhttadáidda Lufuhttii
– Leat eanet sámit Lofuohtas go okta ge jáhkká, muitala Sámi Lávddi jođiheaddji Ada Einmo Jürgensen, gii jođiha prošeavtta «Popup Sápmi». Dál bohtet Sámi lávdedáiddárat gáhttadáidagiin Norgga njunušteáhterfestiválii mii lea Stamsundas.
Sámi oasit galget leat oidnosis dán giđa lávdedáiddamáidnasis Norggas. Prográmma lea nomádalaš, ja lávdedáiddárat ceggejit lávu ja
Sámi manifestašuvdna
Stamsunda Teáhterfestivála jođiheaddji Thorbjørn Gabrielsen lohpida ođđajurddašeami dán jagi festiválas, ja lea 18. geardde go lágiduvvo.
– Mii oaidnit sámi dáidaga seamma lunddolažžan festiválas go eará Davvi-norgga dáidaga. Dan dihte leat ge bovden sámi teáhterbirrasa čájálmasaiguin, ja šaddá sierra festivála festiválas, muitala Gabrielsen preassadieđáhusas. Mielde lea Kristin Nango, Sarakka Gaup, Anitta Suikkari, Mikkel Gaup, Mary Sarre, Mette Brantzeg, Hilde Skancke Pedersen, Anja Saiva Bongo Bjørnstad, Ingá Márjá Sarre, Stina Therese Lorås Hessaa, Elisabeth Heilmann Blind, Åsa Simma, Siri Broch Johansen, Ada Einmo Jürgensen, Marianne U. Kappfjell, Kenneth Haetta ja Johan Sara jr.
– Dát sámi dáiddárat mat bohtet lea dego čielgedeahkki, ja sii galget oidnot ja gullot Stamsundas, muitala Gabrielsen.
Sámi vuođđudeaddjit
Stamsund Internasjonale Teaterfestival (SIT) lea dálááigásaš internašunála lávdedáiddafestivála mas leat sihke sierra buvttadeamit ja earáid buvttadeamit.
Sámi teáhterat, Beaivváš Sámi Našunálateáhter ja Åarjelhsaemien Teatere ledje mielde vuođđudeame festivála, ja leat searvan sin buvttademiiguin máŋgga geardde álggu rájes.
– Lofuohta lea guovlu mas lea sámi historja, bures čihkkon ollugiidda. «Pop-up Sápmi» iskagoahtá Lofuohtas eahpeávnnaslaš ja kultuvrralaš árbbi, ja ráhkada deaivvadeami ja deaivideami dálá áiggiin, muitala Ada Einmo Jürgensen.
Jotket ovdanbuktit ja juohkit ipmárdusa
Son oaivvilda ahte beroštupmi sámi dáidagii ja kultuvrii lea ođasmahtton maŋŋel Tråante 100jagi ávvudoaluid. Norgga kulturráđi konferánsa, mii lei 2017 loahpas mas lei sámi suhttu fáddán, buvttii Sámi Lávdái inspirašuvnna joatkit sámi dáidaga viidodaga ovdanbuktimiin, ja addit earáide ipmárdusa mii Sápmi lea. «Pop-up Sápmi» čájehuvvo Stamsunda Internašunála Teáhterfestiválas miessemánu 31. beaivvi gitta geassemánu 2. beaivvi rádjái.