Dál lea Mázes sihke čuoigan- ja sihkkelastinláhttu
Máze čuoiganláhttu ii leat máŋggalogi jahkái geavahuvvon, muhto dál galgá dilli rievdat. Dál lea láhttu heivehuvvon sihke čuoigamii ja sihkkelastimii ja sáhttá ge de geavahuvvot birra jagi.
Mázes ii leat guovttilogi jahkái leamašan čuoiganláhttu mas leat čuovggat doaibman. Danne eai leat ge sevdnjesáiggi dálvet sáhttán geavahit čuoiganláhtu mii doppe lea.
Maŋemus jagiid lea ge Máze čuoiganláhttu unnán geavahuvvon, dušše muhtun čuoigancupat leat doppe lágiduvvon giđaid maŋŋel go beaivvit čuvggodit.
Bidjan čuovggaid ja čorgen
Mariann Sivertsen Haetta, gii lea Máze Valáštallansearvvi jođiheaddji, muitala ahte Máze Valáštallansearvi lea dál bidjan návccaid divodit čuoiganláhtu. Čuoiganláhtu boares čuovggat leat molsojuvvon ođđa čuovggaiguin. Láhttu, mii lei buot vuovdiluvvan go ii leat geavahuvvon, lea dál njaskojuvvon fas.
Ožžon speallanruđaid
Máze Valáštallansearvi lea lonuhan daid boares billahuvvan čuovggaid čuoiganláhtus ođđaáigásaš Led-čuovggaiguin. Dan dahke juo dálvet.
– Dan lei vejolaš dahkat go mii leat ožžon speallanruđaid Norsk Tippingas ja oasi lea valáštallansearvi máksán searvvi ruđaiguin, muitala Máze Valáštallansearvvi jođiheaddji, Mariann Sivertsen Haetta.
Áŋgirat eaktodáhtolaččat bargat
Dán vahkku ledje áŋgiris giliolbmot čohkkestan searaid ja deaivvadedje čuoiganláhtus gos lei olu bargu ain vuordimin.
– Sihke mánát ja rávisolbmot serve bargguide. Mii ráhkadeimmet earret eará šalddi ovtta jogaža badjel, ja olles láhttu, mii lea 2,5 km guhku, njáskojuvvui ja čorgejuvvui, muitala Mariann Sivertsen Haetta.
Sihke čuoigan- ja sihkkelastinláhttu
– Mii dahkat dán vai šaddet eanet doaimmat gilis ja maid nannet oktavuođa giliolbmuid gaskkas. Mii sávvat ge ahte vel eanebut movttiiduvvojit čuoigat ja maiddái sihkkelastit meahcis, muitala Mariann Sivertsen Haetta.
Lágidit stuorát čuoigamiid
Sivertsen Haetta lohká sin sávvat maid ahte dál besset lágidit stuorebuš čuoigamiid, nu go ovdamearkka dihte guovllučuoigamiid, Davvikalohttačuoigamiid dahje eará čuoigamiid.
Dárbbašit láhttoráhkadanmašiinna vel
– Nubbi lávki dáin bargguin livččii dál oastit láhttoráhkadanmašiinna. Dat lea divrras diŋga, ja mii fertet sávvat ahte oažžut juogasajis doarjaga dan oastit, lohká Mariann S. Haetta, ja lasiha ahte dan haga gal lea lossat doallat láhtu rabas.
Searvi ii leat vel geahčadan man olu dakkár mávssášii.