– MIHTTU FAS STUORIMUS báikkálašsearvi NBR:S
Son lei Guovdageainnu Johttisápmelaččaidsearvvi (GJSS) válgalávdegotti vuosttaš kándidáhtta jođihit, ja diehttelasat válljejuvvui jođiheaddjin. – Fertejin jurddašit gal ovdal go mihten searvat kandidáhttan, lohká son ieš. Mihttu lea fas stuorimus báikkála
Guovdageainnu Johttisápmelaččaidsearvi (GJSS) doalai jahkečoahkkima mánnodaga geassemánu 4. beaivvi. Čoahkkimis lei earret eará jođiheaddji- ja stivraválljen. Jođiheaddjin šattai Berit Kristine Utsi (34). Son gullá Ittunjárgga orohahkii, ja lea dál válljen vuolgit jođiheaddjin GJSS:I.
Mihttu stuorimus
Sus lea čielga mihttu mainna áigu bargat hui vuđolaččat ja dárkilit.
– Mihttu lea ahte GJSS galgá fas šaddat stuorimus báikkálaš searvin NBR vuogádagas, lohká son. Sus lea veaháš bargu vuordagis, go GJSS:S lea leamaš oktii dat stuorimus báikkálaš searvi, muhto dál vuolgá son riikkačoahkkimii čiežain áirasiin.
Čielga politihkka
Utsi:s lea maid čielga jurdda movt áigu dan olihit.
– Mii fertet čorget dál searvvi áššiid ja doaibmagoahtit ja eambbo leat oidnosis, lohká son.
– Oaivvildat go de ahte searvi ii leat doaibman ovdal?
– In, muhto mii fertet fas oažžut ruovttoluotta miellahtuid. Dan mii fertet olihit go lea čorgadis searvi, ja čielga áššit maiguin áigut bargat. Dainna lágiin jáhkán miellahtuid fas oažžut searvái, go miel- lahtuid haga hal ii doaimma searvi, lohká son.
Rehketdoallu ii dohkkehuvvon
GJSS lea rahčan 2017 rehketdoalu oažžut dohkkehuvvot, ja dat ii leat vel dál ge dohkkehuvvon.
Manin rehketdoallu ii leat gárvvis ja dohkkehuvvon?
– 2016 rehketdoallu lea revisordohkkehuvvon, muhto searvvi jahkečoahkkin gáibida čilgehusa. 2017 rehketdoallu ii leat dan muddui gárvejuvvon ahte sáhttá revisor dahje jahkečoahkkin dohkkehit. Nu lea heajos ruhtadili geažil, eambbo in áiggo dadjat dan birra. Dan maid sáhtán dadjat lea ahte mii fertet dál bivdit NBR:S veahki gárvet rehketdoalu vai lea dohkkeheami rájes, ja dan jáhkán mii gal olihit, lohká son.
Hástalusat
Utsi ii leat dakkár gii hupmá bajimusas, go galgá muitalit manin son lea dál válljen váldit badjelasas jođihit GJSS. Son lea baicce dakkár gii dárkilit jurdila ovdal go vástida. – Boazodoalus leat nu olu hástalusat, ahte mun dovddan dárbbu daiguin bargagoahtit. Mii dárbbahit nanu berošteaddjiorganisašuvnna boazodoalus, ja dan áiggun geahččalit olihit GJSS bokte. Lohpidan maid searvvi miellahttuide luoikat bealji, vai muitalit munnje iežaset hástalusaid, ja dakko bokte mus maid leat konkrehta diŋggat maiguin barggan ain viidáseappot, lohká son vel loahpas.