Beaivváš Sámi Našunálateáhter dáhttu gudnejahttit Nils-aslak Valkeapää-rohki
Beaivváš Sámi Našunálateáhter dáhttu gudnejahttit Nilsaslak Valkeapäärohki go servet Norgga lávdedáiddafestiválii Heddadagene. «Áillohaš» čájálmasas lea máilmmepremiera ja čalmmustahttá multidáiddára luđiid ja poesiija.
Dán vahkkus álget Heddabeaivvit gos 31 Norgga teáhtera galget čájehit oktiibuot 45 teáhterčájálmasa. Beaivváš Sámi Našunálateáhter lea maid bovdejuvvon ja lea buvttadan «Áillohaš» čájálmasa. – Mii leat ráhkadan konseartačájálmasa Áillohačča luđiiguin ja poesiijain. Go dáiddárat jápmet, de dávjá jávket maiddái sin buktagat. Nils-aslak Valkeapää leamaš nu dehálaš Sámi servodahkii ahte lea dehálaš seailluhit su dáidaga. Čájálmasain háliidit su gudnejahttit ja čájehit su dáidaga nuorat buolvvaide, lohká Beaivváš Sámi Našunálateáhtera hoavda ja bihtá bagadalli, Rolf Degerlund.
Máilbmái
«Áillohaš» konseartačájálmasas lea vuosttaščájálmas Norgga lávdedáiddafestiválas mii lágiduvvo Oslos geassemánu 8. beaivvis 17. beaivái. Beaivváš Sámi Našunálateáhter ovdanbuktá čájálmasa guktii Det Norske Teáteris lávvardaga geassemánu 16. beaivvi.
– Muđui eai leat plánat johtit čájálmasain. Jurdda lea ahte bihtáin galgá boahtteáiggis vejolašvuohta ovddastit Sámi iešguđetge guovlluin. Bihtáin lea sihke álki ja hálbi johtit. Ulbmil lea fievrridit Áillohačča poesiija ja luđiid máilbmái, lohká Degerlund.
Dehálaš lávdi
Heddadagene čalmmustahttet miehtá Norgga teáhteriid. Beaivváš Sámi Našunálateáhtera hoavda dadjá dán dehálaš lávdin.
– Sámi kultuvra ja dáidda leat dehálaš oasit Norgga teáhteris, muhto mii fertet váldit stuorát saji vai šattašeimmet lunddolaš oassin das. Danin lea dehálaš oidnot ovdamearkka dihtii Heddabeivviin. Sámi teáhter han lea seamma buorre ja dehálaš go eará teáhterat, lohká Degerlund.
Son muitala ahte Beaivváš Sámi Našunálateáhter váldá fárrui olles bargoveaga Norgga oaivegávpogii.
– Buot bargit vulget studiemátkái Heddabeivviide. Lea hirbmat dehálaš geahččat eará teáhterčájálmasaid vai bargit ja teáhter ovdánit, lohká teáhterhoavda.
Eai nammaduvvon
Heddadagene geige maiddái máŋga bálkkašumi Norgga teáhteriidda ja neavttáriidda. Guovtti jagi áigi gudnejahtte Beaivváš Sámi Našunálateáhtera čájálmasa «Vidas Extremas» erenoamáš dáiddalaš barggu ovddas. Teáhterhoavda Rolf Degerlund lei sávvan ahte nammaduvvojit muhtin bálkkašupmái maiddái dán jagi, muhto dán vuoru ii árvaluvvon oktage Sámi teáhterbihttá makkár ge bálkkašumi vuoitit. Åarjelhsamien teáhter oasálastá maid Heddabeivviin, ja ovdanbuktá «Tjidtjie» dahje «Eadni» nammasaš bihtá mii muitala internáhttaeallima birra. Mátta-sámis dáruiduvve olu mánát internáhtas, muhto seammás leat ođđa áiggis olu mánát gártan ássat internáhtas vai besset Sámi skuvllain vázzit.