Ollu ferte leat lohpi dadjat
NRK Sápmi muitala ahte Elliidgáhttensearvi «Dyrenes Røst» lea váidán politiijaide Sámi bivdoja meahcástansearvvi jođiheaddji, Johan Ingvald Haetta, ja ovddeš Ruoŧa beale sámediggeáirasa, Ol-johán Sikku, go leaba hásttuhan olbmuid lobiheamet bivdit čáhcelottiid. NRK Sápmi čállá ahte Haetta lea ávžžuhan iežaset miellahtuid bivdit árbevirolaččat čáhcelottiid. Ol-johán Sikku ges galgá seamma artihkkalis ávžžuhan loddejeddjiid šiehtadit áiggi goas buohkat vulget oktanaga bivdit beroškeahttá máid láhka dadjá. Dyrenes Røst searvi oaivvilda ahte soai rihkkuba dáid cealkámušaiguin Norgga lágaid, go lea lobiheapme oalgguhit lobihis daguid bargat. Dan dihte leat ge sudno váidán politiijaide. Ieš alddis lea áibbas duohta elliidgáhttensearvvis, ahte oalgguhit dahje hásttuhit bargat lobihis daguid maiguin sáhttá ráŋggáštuvvot lea lobiheapme. Muhto dás aŋkke lea stuorra gažaldat, ahte boahtá go cealkinfriddjavuohta ovdalii dan paragráfa mii gieldá olbmuid hásttuhit lobihis daguid dahkat.
Dan diehtit ahte cealkinfriddjavuohta Norggas diktá oalle ollu dadjat, ovdal okta ge lea rihkkon lága. Juste dan ektui ferte ge politiijajurista árvvoštallat dan konkrehta váidaga. Dat lea dan láhkai, ahte cealkinfriddjavuohta addá buot olbmuide friddjavuođa dadjat dan maid oaivvilda dahje dadjat juoidá juoga man birra. Cealkinfriddjavuohta lea ge garrasit gáhttejuvvon sihke riikka- ja riikkaidgaskasaš lágain. Dasa lassin guoská maiddái cealkinfriddjavuohta dasa, ahte galgá leat friddjavuohta gaskkustit jurdagiid dahje daguid cealkima bokte.
De lea ge juste dat gažaldat, ahte leaba go Haetta ja Sikku dušše muhtun idéaid gaskkustan man rievtti addá cealkinfriddjavuohta buot olbmuide. Dávjá ferte ge cealkinfriddjavuođas leat eambbo deaddu go hástaleamis, vaikke soames dan geažil sáhttá rihkkut lága. Dat mii lea hui váralaš ahte jus dákkár cealkámušat jávket almmolašvuođas ja daddjojit dušše čihkosis, de daid ii oainne ja gula okta ge gii sáhttá dakkár cealkámušaid vástidit vuostá. Danne ferte ge dávjá cealkinfriddjavuođas eambbo deaddu vai dákkár cealkámušat eai gullo eará go «gitta uvssaid» duohken. Dat lea dieđus áibbas čielggas, ahte cealkimat mat leat rihkolaš áitagat, konkrehta olbmuid dahje joavkkuid vuostá, galget ráŋggáštuvvot. Muhto dán áššis dieđus lea sáhka dan birra, ahte Haetta ja Sikku dadjaba juoidá dan ektui máid sápmelaččat leat guhká bargan, ahte bivdán čáhcelottiid giđđat. Dasto lea ge gažaldat, ahte leago lobiheapme ávžžuhit juoidá bargat mii sápmelaččaid riekteáddejumi mielde lea lobálaš.
Danne ferte ge dávjá cealkinfriddjavuođas eambbo deaddu vai dákkár cealkámušat eai gullo eará go «gitta uvssaid» duohken.