Váidon politiijaide maŋŋel NRK Sámi artihkkala
Elliidgáhttensearvi lea váidán guoktása NRK Sámi artihkkala vuođul.
Elliidgáhttensearvi «Dyrenes Røst» lea váidán politiijaide Sámi bivdo- ja meahcástansearvvi jođiheaddji, Johan Ingvald Haetta, ja ovddeš Ruoŧa beale sámediggeáirasa, Ol-johán Sikku, go leaba hásttuhan olbmuid lobiheamet bivdit čáhcelottiid.
NRK Sápmi čállá ahte Haetta lea ávžžuhan iežaset miellahtuid bivdit árbevirolaččat čáhcelottiid.
– Mii eat sáhte dohkkehit šat dálá ortnega, go dat badjelgeahččá min árbevieru, dadjá Johan Ingvald Haetta NRK Sápmái.
– Šiehtadit oktanaga bivdit
Ol-johán Sikku ges galgá seamma artihkkalis ávžžuhan loddejeddjiid šiehtadit áiggi goas buohkat vulget oktanaga bivdit beroškeahttá máid láhka dadjá.
– Loddejeaddjit Guovdageainnus berrejit čoahkkanit ja akšuneret, dadjá ges Sikku seamma artihkkalis.
– Rihkkuba lága
Dyrenes Røst searvi oaivvilda ahte soai rihkkuba dáid cealkámušaiguin Norgga lágaid, go lea lobiheapme oalgguhit lobihis daguid bargat. Dan dihte leat ge sudno váidán politiijaide.
– Lea lobiheapme ávžžuhit lobihuššat. Dat lea nu duođalaš ahte politiijat berrejit ráŋggáštit. Lobihis bivddut giđđaloddemis lea stuorra váttisvuohta, ja máŋggas leat ge ráŋggáštuvvon daid geažil, dadjá Dyrenes Røst jođiheaddji Jenny Rolness NRK Sápmái.
Ožžon váidaga
Politiijat duođaštit iežaset ožžon váidaga.
– Dan lea dál árvvoštallame jurista, dadjá Håkon Kvandal, Finnmárkku politiijaguovllus.