Sámi dáiddageassi
Dán jagáš nu gohčoduvvon feastariepmo-profiila Hársttáid dáiddafestiválas «Festspillene i NordNorge» lea Máze dáiddár ja arkiteakta Joar Nango. Son lea okta Davvi-norgga dovdoseamos dáiddáriin maiddái internašuvnnalaččat. Nangos leat leamaš ollu čájáhusat miehtá máilmmi, earret eará máilmmi stuorámus dáiddačájáhusas Documenta 14 Athenas. Oassin iežas feastariepmoprošeavttas áigu son álggahit sierra searvvi sámi arkiteavttaide – Sámi Arkiteakta Searvi (SAS). Son áigu festivála oktavuođas ásahit unna, mobiila visttáža masa lea inspirašuvnna ožžon árbevirolaš sámi gaskaboddosaš huksehusaid málliin. Dát visttáš galgá leat rabas olles festiválavahkku ja doaibmat čoahkkebáikin gos galgá vejolašvuohta ságastallat sámi servodatovdáneami ja arkitektuvrra birra. Nango doallá nai seminára sámi arkitektuvrra birra mii lágiduvvo festiválas geassemánu 25. beaivvi. Maiddái Riddu Riđđu festiválas Gáivuonas beassat oaidnit sámi dáidagiid ja dujiid dán geasi.doppe lágiduvvo duodječájáhus «Duodji Dreamers» mas oasálastet logi nuorra duojára geat leat eret iešguđet guovlluin Sámis. Sii leat: Anniina Turunen, Laila Mari Brandsfjell, Lisa Lyngman Gaelok, Merethe Kuhmunen, Milana Sapelnikova, Niká Pittja, Ove Stødle, Patric Jonsson, Sandra Márjá West ja Sara Inga Utsi Bongo. Duodji Dreamers lea Riddu Riđu, Davvi Álbmogiid guovddáža ja Sámi Dáiddamagasiinna ovttasbargu. Prošeavtta buvttadeaddji lea Ellen Berit Dalbakk.