Časkkii iežas persovnnalaš olahusa 15 gilosaš luosain
Ii leat áigá go dán jagáš luossaáigodat álggii. Kárášjohkalaš Veijo Paltto gottii 15 gilosaš luosa Ássebávttis, muhto ii leat liikká ieš nu hirpmahuvvan dainna.
Veijo Paltto muitala iežas liikot bivdit luosaid, ja dahká ge dan go leaš fal dilli. Dán háve lei Ássebávttis bivdime, go stuora luossa dohppii.
– Mun ledjen fatnasiin bivdime go luossa darvánii, ja dalle ii láve nu váttis oažžut luosa bajás. Liikká lei oalle biegga, mii dagahii ahte lei veahá váddásit oažžut bajás luosa, muitala Paltto bivddu birra.
Ii leat nu hirpmahuvvan
Luossa, man Veijo lea goddán, lea máilmmi stuoris, ja deaddá olles 15 gilo. Liikká ii leat Paltto nu hirpmahuvvan dainna stuora luosain.
– Luossa lea oalle stuoris, muhto gal doppe gávdnojit arvat stuorát luosat go dát, lohká son.
Liiko bivdit
Veijo lohká iežas mielas hui somán bivdit luosaid, ja bidjá ge áiggi dasa go leaš fal vejolašvuohta.
– In leat gal nu máilmmi áŋgiris luossabivdi, muhto mun liikon dasa hui bures. Mu mielas lea somá bivdit, go de beassá ráfis sugadit fatnasiin ja guldalit luonddu jienaid, lohká son.
Giđabealde dábáleabbo goddit stuorahiid
Veijo lohká giđabealde dábáleabbon goddit stuora luosaid, ja muitala iežas maid goddán olu luosaid ovdal. – Gal lean munge muhtin luosa goddán. Dát luossa oidnui ahte lei Iešjoht-luossa, go lei nu oanehaš jorbodaga ektui. Jáhkán dát sáhttá leat dat stuorámus luossa maid lean goasse goddán, lohká son.
Ii duostta árvvoštallat
Vaikko Veijo árrageasi časkkii ge iežas persovnnalaš olahusa, ja gottii 15 gilosaš luosa, de son ii duostta árvvoštallat šaddá go dát geassi buorren luossajahkin.
– Ii hal dan dieđe goasse makkár luossajahki šaddá. Diibmá han lei hui buorre luossajahki, go godde olu ja stuora luosaid. Liikká in goddán mun earret go ovtta, boagusta Paltto.
annemaret@avvir.no