Šattai biilašilttaid heŋget uksii
Guovdageainnus šadde heŋget vuojándovdomearkkaid uksii, go leansmánnekantuvra ii lean rabas, vaikko livččii galgan leat rabas.
Guovdageainnus vásihii Lisa Baal ahte šattai leansmannekantuvrra uksii guođđit vuojándovdomearkka heaŋgát, go ii lean rabas kantuvra, vaikko livččii galgan leat rabas, ii ge de beassan doalvut sisa daid.
– Das lei juo heaŋgáme busse, ja mun maid bidjen iežan vuojándovdomearkka dan bussii, muitala Baal.
Álkes fálaldat
Baal lohká ahte son riŋgii 02800 ja humai Girkonjárgga bargiin dan birra. Son gávnnahii ahte gal son maid bidjá iežas dovdomearkka bussii.
– Jurddahin ahte dat goit lei álkes fálaldat, go sáhttá guođđit dovdomearkkaid bussii mii heaŋgá uvssas, dadjá son.
Ii galggaše nu
Øyvind Lorentzen muitala ahte politiija, gii lei barggus, lei juste gažadeame muhtima, ii ge astan de rahpat rievttes áigái. Eai ge lean earát barggus geat sáhtte rahpat kantuvrra.
– In leat áibbas sihkar man guhká lei gitta, dan in leat vuos ožžon čielgasii. Dieđán ahte dat rahppui veahá maŋŋel almmolaš rahpanáigi, dadjá Lorentzen.
Šállošahtti go nie geavvá
Lorentzen šálloša go ii lean rabas, ja ávžžuha olbmuid easka buktit vuojándovdomearkkaid go leansmannekantuvra lea rabas.
– Buktet vuojándovdomearkkaid go lea rabas. Ii leat nu sihkar nie dušše heŋget uksii daid, dadjá Lorentzen.
– Mii livččemet sáhttán juogalágan ortnega ordnet gosa besset dušše coggalit dovdomearkkaid, nu go máhkaš unna boksáža. Muhto de sáhttet olbmot álgit nu olu ártegit dohko coggat, ahte dan ii ge leat vejolaš, lasiha Lorentzen.
Ii politiijaid ovddasvástádus
Jus diesa guođđá heaŋgát maide, de lea du iežat ovddasvástádus, muittuha Lorentzen.
– Jus dies livččii mihkke suoláduvvon, de ii livčče politiijaid ovddasvástádus leamaš dat, dadjá son.
– Ii leat nu ahte sáhttá dušše heŋgestit uksii, jurddahit ahte dál lea son dolvon vuojándovdomearkkaid, dál leat politiijat ožžon daid ja de reageret jus suoláduvvojit go dies heangájit, lasiha Lorentzen.
– Dieđusge ii livčče nu somá jus muhtin livččii suoládan dieid vuojándovdomearkkaid. Dávjá jurddahit ahte eai unna báikkážiin dan bargga, muhto ii dan goasse dieđe, loahpaha Lorentzen.