Evttoha rievdadit sierravuodjinlobiid meannudeami:
Guovdageainnu suohkana meahcástanstivrra jođiheaddji áiggušii rievdadit sierravuodjinlobiid meannudeami. – Olu áigi ja ruhta manná duššás, jus fal eat rievdat vuogádaga, dadjá Per Nils Saari.
Guovdageainnu suohkanis sáhttá leat ođđa olahus man olu sierravuodjinlobiid leat meannudan dán jagi vuosttaš guđa mánus. – Olu áigi manná sierravuodjinlobiid meannudeapmái maid suohkana hálddahus lei sáhttit dahkat, lohká meahcástanstivrra jođiheaddji.
Mannan duorastaga, geassemánu 28. beaivvi, doalai Guovdageainnu meahcástanstivra čoahkkima gos meannudedje badjel čuođi sierravuodjinlobi. Go ledje geargan čoahkkimiin, de eai leat sii jáhkkimis goassege meannudan nu olu sierravuodjinlobiid go dán jagi vuosttaš guđa mánus leat dahkan, namalassii 1030.
Áigi ja ruhta duššás
Guovdageainnu suohkanis lea nu oainnat ahte meahcástanstivra galgá meannudit juohke sierravuodjinlobi mii boahtá suohkanii, ja dainna gal šaddá olu bargu.
– Mii meannudeimmet dál 1030. sierravuodjinlobi, ja lea diehttelas ahte dasa manná olu áigi, na olu áigi ja ruhta maid duššás, jus fal eat rievdat vuogádaga. Jáhkán dat lea ođđa olahus, go mu muittus eat leat meannudan nu olu sierravuodjinlobiid goassege go leat dán jagis vuosttaš guđa mánus dahkan, muitala Guovdageainnu suohkana meahcástanstivrra jođiheaddji, Per Nils Saari.
– Mis leat leamašan unnimusat guokte čoahkkima mánnui, ja de oaččut ieš jurddašit man olu áigi dasa manná, lohká son.
Rievdadit vuogádaga
Saari lohká ahte sii leat addán dieđu dál suohkana hálddahussii, ahte dál galget dahkkot vuogádagat nu ahte olbmot galget beassat vásedin báikkiide dušše suohkana bálvaluskantuvrras viežžat sierravuodjinlobi. Son čilge manin dat livččii buoret vuogádat:
– Muhtun sierravuodjinlobiin leat ohcan lobi vuodjit 10-12 sadjái, earát leat fas ohcan buot suohkana meahcceluottaid beassat vuodjit, ja lea čielggas ahte dat ii atte nu buori gova olgguldas máilbmái. Vaikko eatnasat eai vuoje dohko gosa leat ohcan, de fertejit ohcat go suohkanis galgá politihkalaččat meannuduvvot juohke sierravuodjinlohpi. Jus mii ovdagihtii mearridit luottaid gosa sáhttet hui álkit, na juo beaivvát ala, oažžut searravuodjinlobi, de eai dárbbaš ná ohcat báikkiide gosa jáhkket iežaset vuodjit, lohká son.
Eai dieđe gosa áigot vuodjit
– Ovdamearkka dihte jus luopmániid áigu čoaggit. Ii dan dieđe dál vuos gos šaddet luopmánat. Muhto de ferte sihkkarastit dál juo sierravuodjinlobi, vaikko ii šatta mannat buot sajiin gosa lea ohcan sierravuodjinlobi. Jus bálvaluskantuvrras sáhtášii viežžat sierravuodjinlobi, de eai dárbba- šivčče ohcat nu go dál Dahket, lohká Saari.
– Lehpet go addán vuodjinlobi visot dán 1030 ohccái?
– Eat leat addán buohkaide gal. Muhto Norgga eiseválddit gal jáhkket dieđus ahte suohkana ássit vudjet nu issorasat, vaikko várra dájuhuvvet dainna ahte go ná šaddet olbmot ohcat juohke guvlui beassat vuodjit, vaikko liikká eai fina ge doppe. Ođđa vuogádat buvttášii rievttes gova olbmuid vuodjindábiin Guovdageainnus, lohká Saari. – Manin leat lassánan ohcamat? – Dan in sáhte nu čielgasit vástidit, muhto vuohtán ahte leat lassánan ohcamat skutervuddjiid bealis. Muđui ii leat mus dasa čielga vástádus, lohká son.
Ovccilogi unnit
Guovdageainnu suohkana teknihkalaš ovttadahkii gullet sierravuodjinlobit, ja teknihkalaš ovttadaga hoavda, Sindre Murud, muitala ahte sii olles diimmá jagis meannudedje 1120 sierravuodjinlobi.
– Mus eai leat ovddit jagiide logut nu álki duohken, go mii leat easka diibmá álgán statistihkaid doaimmahit. Muhto diimmá logut gal leat mus. Olles diimmá jagis meannudedje 1120 sierravuodjinlobi suohkanis, lohká son.
Ávvir ii lihkostuvvan oažžut loguid Kárášjoga gielddas. Ávvira journalista lea okta dain 1030 ohccis geat leat ohcan sierravuodjinlobiid maid dán jagi leat dán rádjái meannudan.