Šiehtadus Álttáin sáhttá fargga
Mannan vahkku dohkkehii Álttá suohkana ovdagoddi ovttasbargošiehtadusa Sámedikkiin, ja mearridedje sáddet ášši Álttá suohkanstivrii dohkkeheapmái. Lea badjel njeallje jagi áigi go Álttá suohkanstivra mearridii álggahit bargguid ráhkadit ovttasbargošiehtadusa Sámedikkiin. Barggut leat mannan njozet, ja lea maid leamašan vuosteháhku muhtun Álttá politihkkariin oba vuolláičállit ge dákkár ovttasbargošiehtadusa.
2014:s, go ášši vuolggahuvvui, ledje politihkkarat Álttá suohkanstivrras geat garrasit vuosttaldedje ovttasbargošiehtadusa, ja gohčodedje dán vuohkin suoli čatnat Álttá sámegiela hálddašanguvlui. Seamma garra digaštallan šattai Romssas maid álggos, go doppe álge bargat ovttasbargošiehtadusain Sámedikkiin. Muhto, doppe jaskkodedje biekkat, ja ovttasbargošiehtadus vuolláičállojuvvui 2013.
Romssa suohkan lei ge vuosttaš suohkan mii vuolláičálii ovttasbargošiehtadusa . Dan maŋŋel leat Bådådjo ja Oslo suohkan maid vuolláičállán ovttasbargošiehtadusa. Dál sáhttá ge Álttá suohkan šaddat njealját gávpotsuohkanin mas lea ovttasbargošiehtadus Sámedikkiin. Dat mearrádus lea dál Álttá suohkanstivrra duohken, ja dan duohken ahte Sámedikki dievasčoahkkin čakčat dohkkeha šiehtadusa.
Maiddái dál vuhtto Álttás vuosteháhku ovttasbargošiehtadussii, ja leat sii geat ávžžuhit Álttá suohkanstivrra hilgut ovttasbargošiehtadusa. Ákkastallamiin daddjo earret eará ahte ii leat vuoiggalaš álbmotjovkui addit «sierravuoigatvuođaid». Dan maid digaštallit dávjá orrot vajálduhttime lea ahte dás ii leat sáhka sierravuoigatvuođain, muhto olbmuid vejolašvuođain váldit vára iežaset gielas ja kultuvrras. Áltá lea okta dain stuorebuš čoahkkebáikkiin Norggas gos ásset eanemus sápmelaččat. Dan dáfus livččii dákkár ovttasbargošiehtadus máilmmi dehálaš sámegiela ja kultuvrra ovddideapmái. Lea oahpes ášši ahte smávva gielat ja kultuvrrat jođánit goarránit majoritehtaid kultuvrraid ja gielaid searvvis, jus daidda eai geavahuvvo návccat vai olbmuide šaddet buoret vejolašvuođat praktiseret iežaset giela ja kultuvrra. Danne leat ge dákkár «gávpot šiehtadusat» dehálaččat sámegiela ja -kultuvrra seailluheapmái.
Dál galggašedje Álttá politihkkárat ja áltálaččat oaidnit mávssolašvuođa dákkár ovttasbargošiehtadusas, eai ge ballat ahte sii govssáhallat dainna jus sápmelaččat besset iežaset giela ja kultuvrra ovdánahttit Álttá suohkanis.
… eai ge ballat ahte sii govssáhallat dainna jus sápmelaččat besset iežaset giela ja kultuvrra ovdánahttit Álttá suohkanis.