– BUOREMUS joavku vuittii
FA Sámi 16-jahkásaš nieidajoavku viežžalii golli mannan vahkkoloahpa čiekčamiin Biŧomis.
Mannan vahkkoloahpa lágiduvvojedje beakkán «Piteå Summer Games» spábbačiekčamat Biŧomis, gos FA Sápmi searvvai nieidajoavkkuin ja bárdnejoavkkuin.
FA Sámi 16-jahkásaš nieiddaid riikajoavku čievččai ge nu bures ahte vuite golli. Sii vuite 1-0 Alvsjö vuostá.
FA Sámi bárdnejoavku vuoittáhalai ráŋggáštuščiekčamiin, muhto sii leat oalle duhtavaččat goitge.
Gelddolaš
– Dat lei hirbmat gelddolaš. Lei álggos 0-0 boađus go goappaš vuorut ledje nohkan. De guhkiduvvui čiekčan vel viđain minuvttain, mas dat gii vuosttažin bidjá moala, vuoitá. Nu de vuittiimet mii ja šattai 1-0 midjiide, muitala FA Sámi nieidajoavkku hárjeheaddji Wanja Blind.
– Goappaš joavkkut geahččaleigga máŋgii deaivat moala, nu ahte lei hui gelddolaš. Mii de loahpas deaivvaimet. Lei hui buorre dat, dadjá son ja muitala ahte sii leat hui duhtavaččat.
– Buoremus joavku vuittii!
Vuosttaš háve go serve
Lei ge vuosttaš háve go dát nieidajoavku searvvai Biŧončiekčamiidda.
– Dát lea oalle bures dahkkon, go mii eat leat ovdal čiekčan doppe, muitala Blind.
– Buot čieža čiekčama ledje dakkár joavkkuid vuostá mat leat fárrolagaid hárjehallan máŋga jagi. Nu ahte mii leimmet rievtti mielde gal liigebuoremusat dain álgočiekčamiin, ja dat gal lea bures dahkkon.
– Sii ledje buohkat hui čeahpit, ja lei buorre joavku.
Blind muitala maid ahte loahppagilvvuin gal lei áibbas eará dássi, ja doppe lei váddásit birgehallat. Vuosttaš čiekčamis vuite sii earret eará 4-0 go čikče Suoma joavkku vuostá, ja dasto 7-0, 7-0 ja 1-1 ovtta A-nissonjoavkku vuostá, ja vuite maid 2-0 Bossegohpi vuostá.
Lei IK Grand čiekči Ane Johansen gii čievččastii vuoitomoala loahpa loahpas.
Norway Cupii manname
Vaikko dál gerge dáiguin čiekčamiiguin, de gal eai áiggo láikkohallat gal.
Dál áigot sii bargat dan nammii ahte nieidajoavkkus šaddá nissonjoavku, ja sii leat maid ráhkkaneame stuorát čiekčamiidda.
– Muhtimat min joavkku čikčiin leat maid dál Norway Cupii ráhkkaneame vuolgit seagášjoavkinus, earret eará muhtun Guovdageainnu valaštallansearvvi nieiddaiguin, muitala Blind.
– Eat lihkostuvvan riekta
FA Sámi bárdnejoavku lei sávvan ahte sii galge dán jagi čiekčat buorebut go diibmá, muhto ii šaddan gal vuoitu dán ge háve.
– Mii manaimet viidáseappot vuorročiekčamiid maŋŋel, šattaimet nubbin iežamet ahkejoavkkus. De beasaimet gávccádasfinálii, ja das vuoittáhalaiamet ráŋggáštuščiekčamiid maŋŋel, muitala bárdnejoavkku jođiheaddji Ole Issát Mienna Ávvirii.
– Šattai vel maŋemus de čiekčan mas vuittiimet 1-0, nu ahte šattaimet várra čihččet-gávccát sadjái.
Son dadjá vel ahte su mielas manai oppalaččat bures, vaikko ledje muhtun hástalusat gal sis.
Hástalusat
– Dat mii mis lei hástalus lei moalaid bidjat dain vejolašvuođain maid oaččuimet. Dat lei min stuorimus váttisvuohta. Čievččaimet hui bures suodjalusas, eat ge luoitán eambbo ovtta moala olles čiekčamis, earret ráŋggáštuščiekčamiin.
– Čiekčanáiggis luittiimet dušše ovtta moala viđa čiekčamis. Muhto de lei hástalus ovddosguvlui bidjat moalaid, ja mii eat bidjan eambbo guokte moala, vaikko livčče gal leamaš vejolašvuođat. Eat mii lihkostuvvan riekta, dadjá Mienna.
Dán jagáš čiekčamiidda serve 779 spábbačiekčanjoavkku 12 riikkas; Argentinas, Estteeatnamis, Suomas, Guatemalas, Latvias, Litauenis, Mexicos, Mongolias, Norggas, Ruoššas, ja USA:S.
Loga olles ášši avvir.no siiddus.