Biilalihkohisvuohta luomus
Dán jagi fitnet várra eanemus olbmot olgoriikkas luomus ja jáhkkimis lassána maid norgalaččaid lohku geat fitnet olgoriikkas biillain. Jus bártidat olgoriikkas luomus, ale heađástuva, muitte dus lea dehálamos reaidu fárus.
Tryg Forsikring rávve preassadieđáhusas olbmuid ahte eai galgga heađástuvvat jus bártidit biillain luomus, galget dušše muitut duođaštit govaiguin nu olu go vejolaš.
– Jus bártidat biillain, govve iežat giehtatelefovnnain buot vahágiid. Seamma leaččat go Norggas vai olgoriikkas, de lea dehálaš duođaštit vahágiid mat leat geavvan biilalihkohisvuođa geažil. Govat maid leat govven lihkohisvuođabáikkis, biillaid ja vahágiid, sáhttet leat dehálaš veahkkin vejolaš vahátáššis boahtteáiggis. Duođašteami haga sáhttá dáhkádusrehket šaddat váddásabbon, jus alddát ii leat káskodáhkádus, lohká Tryg Forsikring biilavahátdirektevra Jeanett Tennefoss.
Ale heađástuva
Olusat válljejit biillain mátkkoštit go besset bisánit gos háliidit ja šiehtadit olu fárrui. Muhto juohke geasi bártidit olusat biilalihkohisvuođain, ja dalle lea dehálaš ahte ii heađástuva.
– Lea álki dárragoahtit, erenoamážit jus ii ádde giela dahje maid nubbi lohká. Govve nu olu go vejolaš biilalihkohisvuođas, mađe eanet don govvet, dađe eambbo duođaštat. Govve lahka, guktuid biillaid registrerennummara ja oppalašgova vahátsajis, lohká Tennefoss
Olgoriikka biillain beaškkihit oktii Norggas
– Jus beaškkihat oktii olggoriikka billain, de leat eará njuolggadusat go Norggas. Mii dáhkádusásahusain rávvet biilaeaiggádiid ahte sis lea riikkaidgaskasaš vahátdieđihanskovvi biillas. Oktasaš vahátdieđiheapmi geavahuvvo eanaš duođaštussan vahátáššis. Jus ii leat ovttaoaivilvuohta, de easkka lea eambbo dehálaš ahte biilalihkohisvuohta
ja dan vahágat leat duođaštuvvon, joatká Tennefoss.
Fina doaktára luhtte
Tennefoss neavvu juohkehačča gii lea leamaš johtolatlihkohisvuođas ja dovdá iežas illávejiid, dalán fitnat doaktára luhtte.
– Dus sáhttet siskilušat vahágahtton, it ge ieš fuomáš dan go easkka maŋŋá. Sáhttá šaddat dehálažžan buhtadusáššis, lohká Tennefoss.
Muitolistu
• Biilavuoddji namma, e-poasta ja telefonnummar.
• Biilavuoddji dáhkádusfitnodat.
• Biilaregistrerennummar ja
riikagullevašvuohta.
• Vihtaniid namat, e-poasta ja
telefonnummar.
• Čále oktasaš vahátdieđu.
•Govve visot, šilttaid, legitimašuvnna, vahátbáikki ja vahágiid.