Oahpaha ja movttiidahttá nuoraid neaktit
Neavttár Ingá Márjá Sarre lágida neavttárkurssaid Sámi nuoraid várás. Son háliida singuin juogadit iežas vásáhusaid vai movttiidahtášii nuoraid bargagoahtit láidedáidagiin.
Sámi neavttár Ingá Márjá Sarre lei dušše 6-jahkásaš go vuosttaš gearddi oaččui mávssu neaktima ovddas. Dan rájes lea olu ovdánan ja olahan. Son lea neaktán sihke filmmain, TV:S ja teáhteriin. Diibmá čađahii maiddái bagadallikurssa vai beasašii earáide oahpahit neaktima. Čakčat lágidišgoahtá neaktinkurssaid Sámi nuoraid várás.
– Mun háliidan movttiidahttit nuoraid neaktit sihke filmmas ja lávddis. Ulbmil lea oahpahit sidjiide buriid bargovugiid ja dieđusge ovdánahttit sin, dadjá Sarre.
Oahpu gaccai Los Angelesis
Diimmá geasi gaccai Ingá Márjá Sarre coach-oahpu beakkán Hollywood neavttárbagadalli Ivana Chubbuck studios Los Angelis. Su vuohki lea juhkkojuvvon 12 oassái, ja dán metoda dáhttu Sarre fievrridit viidáset Sámi nuoraide.
– Ivana dajai ahte ádjána njeallje jagi olahit buot cehkiid, ja dat mearkkaša ahte guovtti beaivvi kurssas ii soaitte oasseváldi geargat go máistit dan. Jurdda lea goit bargat nu guhkás go juohkehaš olle. Mun ávžžuhan oasseváldiid searvat lassi kurssaide jus dovdet ahte háliidit bargat eanet dáinna maŋŋel vuosttaš kurssa. Dán teknihka geažil lean šaddan duostileabbon neaktima geainnus ja neaktin lea šaddan vel dehálit oassin mu eallimis. Jus galgá hui álkit čilget, de galgá Chubbuck teknihkas iežas persovnnalaš eallinvásáhusaid geavahit neaktima oktavuođas. Jus ovdamearka dihtii neaktá ráhkisvuođascenas, de sáhttá jurddašit muhtima birra geasa leamaš ráhkásmuvvan. Go iežas eallima ektui bargá, de orru eanet duohta, čilge son.
Ovdánahttinvejolašvuođat
Filbmakurssat leat nuoraid várás geat leat gaskal 16- ja 26-jahkásaččat. Internašunála Sámi Filbmainstituhtta ruhtada kurssa ja danin lea dát nuvttá fálaldat. Ingá Márjá Sarre lágidišgoahtá kurssaid borgemánu gaskamuttus ja pláne doallat kurssaid Anáris, Gironis, Oslos, Romssas, Guovdageainnus ja Kárášjogas/deanus.
– Mun ávžžuhan nuoraid, geat háliidit bargat filmmain dahje teáhteriin, ohcat kursii, lohká son. Dát kursa heive maiddái sidjiide geat ain leat ohcamin, leat sáhkkit ja háliidit geahččalit ođđa doaimmaid.
– Mun fuomášin ahte háliidan bargat neavttáriin maŋŋel go ledjen «Skáidi» Tv-ráiddus mielde 1994:s. Lea hirbmat hástaleaddji ja somá bargat neavttárin. Ii oktage dáiddalaš proseassa leat seammalágan ja dovddan ahte ii okta ge beaivi šatta ovttageardán ja seammaláganin. Vaikke lean guhká neaktán, de in leat vel olahan buot iežan mihttuid neaktima dáfus. Neavttárin lea álo vejolašvuohta ovdánit, ja doaivvun ahte juohke dáiddalaš barggu bokte olaha unnimusat ovtta ulbmila. Neaktimis beassá maid stoahkat ja olmmoš beassá dávjá máhccat mánnávuhtii ja bargat áššiiguin mat leat čihkkon sillui, muitala Ingá Márjá Sarre.
Sámi nuoraid kursaplána ii leat vel gárvvis, muhto dat almmuhuvvo chubbucknorway. no nammasaš neahttasiidduin fargga.