Fiškalii golli
Gilvu masa Haetta searvvai gohčoduvvo meahccebáhčimin, doppe galgá báhčit govaid main leat iešguđetlágán eallit. Guovžžat, riebanat, lottiid ja nu ain.
Gaskal 30 ja 200 mehtera duohken ledje govat maid gilvaleaddjit galge deaivat báhčit.
Dakkár gilvu heive buohkaide
Gilvui ledje searvan 60 olbmo, iešguđetge dásis. Doppe serve sihke nuorra ja vuorrasit olbmot. Haetta muitala ahte boarráseamos gilvaleaddji gii searvvai lea badjelaš 80 jagi boaris.
– Gilvu heive sihke mánáide ja rávesolbmuide. Dat heive buohkaide, lohká Haetta.
Áigu joatkit gilvvohallamiin
Ii leat vuohččan go Haetta searvá báhčingilvvuide ja vuoitá.
– Lean vuoitán golmma, njealje háve dakkár báhčingilvvuin. Lean searvan ollu gilvvuide, ja dieđusge áiggun joatkit dainna maid.
Gilvu lea dego varas
Haetta lohká iežas veteránaluohkás dal, ii ge loga gal áigut heaitit báhčingilvvohallamis go lea nu guhká juo gilvvohallan.
– Rumaš máhttá dan, ja oažžu lohkat ahte dat lea juo measta dego
varrii darvánan. Áigguain joatkit dainna.
Váibmu coahkká jođáneappot
Haetta lohká máilmmi gelddolažžan go vuoitá báhčingilvvuin.
– Mun ja son gii nubbin bođii gilvvuin, moai leimme nu dássálaga finálas, ahte de šattai nuppes báhčin mas šattaime ođđasit báhčit. Šattai dakkár nubbi finálavuorru ja váibmu dieđusge álgá oalleladje coahkkit go garra gilvu lea.
Addá buori dovddu gilvalit
Haetta lohká iežas álot liikon gilvalit, mánnávuođa rájes juo. Dalle son lávii gilvalit čuoigamis, vuodjamis, njuikemis, čierastallamis ja ollu eará gilvvuin. Rávisolbmožin lea son dainna joatkán.
– Gilvvohallan lea dakkár eallin. Mun liikon dasa. Gilvvus ii ábut ballat vuoittáhallamis, go dat lea gilvu. Addá buori dovddu gilvalit gilvvuin.
Guovdageaidnulaš Adam Klemet Haetta šattai Davvi-norgga meašttirgilvvu buoremus báhččin, mii lágiduvvui Árborddis.