– Viimmat ovttadásiin eanadoaluin
Dán mánu rájes ožžot badjeolbmot geassit eret ovttaháválas- ja lasseárvodivada. – Viimmat beassat eanadoalu dássái divatgeahpedeamis, lohká badjeolmmoš Eva Nordfjell Plassjes.
Suoidnemánu vuosttaš beaivvi bođii fápmui ođđa divatgeahpedeapmi badjeolbmuide go ostet skohtera ja ATV mat geavahuvvojit boazodoalus, dieđiha ráđđehus.
– Viimmat beassat eanadoalu dássái divatgeahpedeamis. Tienas livččii iešalddis buorre, muhto doaibmagolut borret stuorra oasi tietnasis. Dát šaddá hirbmat buorre midjiide, lohká badjeolmmoš Eva Nordfjell Plassjes ja lohká dál šaddá álkit árgabeaivi.
ATV ja skohtera haga ii birge
Ráđđehus dieđiha dán divatgeahpedeami olis ahte dál sáhttet buohkat geat barget boazodoaluin oastit njeallje dahje gávcci muohtaskohtera dahje ATV guovtti jagi áigodagas maid geavaha boazo- doalus, iige dárbbaš ovttaháválasdivada daid ovddas máksit. Badjeolbmot sáhttet maid geassit lasseárvodivada dán áigodagas, maiddái go divuhit ja geavaha dáid doaibmafievrun.
– Dál sáhttit lonuhit doaibmafievrruid dávjjibut, eat ge dárbbaš nu olu ruđa velá lasihit go oastit ođđa vuojána. Doaibmafievrrut gollet hirbmadit jođánit boazodoalus ii ge dain leat olus árvu go fertet lonuhit, lohká Eva Nordfjell.
Muitala sii dárbbašit skohteriid ja njealjejuvllagiid seamma divdnadit go boanda dárbbaša tráktora.
Oktaviđatoasi geahpeda
Eva Nordfjell muitala divatgeahpedeapmi geahpeda sin goluid mealgat.
– Bealli min doaibmagoluin manná doalahit fievrruid ortnegis, divuhit daid ja oastit boaldámuša. Jáhkán dát geahpedeapmi mearkkaša birrasii 20 proseantta. Lea olu ruhta, čilge badjeolmmoš Eva Nordfjell Plassjes.
Lohká bearrašii šaddá maid geahppasat árgabeaivi, go ii dárbbaš váldit liigebarggu vai birgejit.
Máŋga jagi bargu
Norgga Boazosápmelaččaid Riikkasearvvi (NBR) jođiheaddji Ellinor Marita Jåma muitala ahte NBR lea dáinna áššiin máŋga jagi bargan.
– Dál leat muhtin muddui beassan go ráđđehus lea dál geahpedan muohtaskohtera ja ATV divadiid. Dat mearkkaša olu boazodollui go dat lea doaibmaruđat. Lea čielggas ahte dát boahtá ávkin ealáhussii, lohká NBR jođiheaddji Ellinor Marita Jåma.
Buohkat geat leat lasseárvoregistaris
Jåma čilge ahte buohkat geat lea lasseárvoregistaris ja ožžot tietnasa boazodoalus, ožžot divatgeahpedeami, beroškeahttá lea go sis siidaoassi vai ii.
– Dát gusto buohkaide geat tinejit eambbo go 50 000 kruvnna boazodoalus. NBR lea dadjan čielgasit eiseválddiide ahte dát divatgeahpedeapmi galgá leat buohkaide geat ožžot tietnasa boazodoalus. Leat hui olu olbmot geat barget boazodoalus, muhto ii leat siidaoassi, deattuha NBR jođiheaddji Ellinor Marita Jåma.