Olu jagiid bargu addán bohtosiid
… rehálaš maiddái sin ektui geain ii leat leamašan dat vuorbi ahte leat ožžon siidaoasi
Suoidnemánu vuosttaš beaivvi bođii fápmui ođđa divatgeahpedeapmi badjeolbmuide go ostet skohtera ja ATV mat geavahuvvojit boazodoalus, dieđiha ráđđehus.
Ráđđehus dieđiha dán divatgeahpedeami olis ahte dál sáhttet buohkat geat barget boazodoaluin oastit njeallje dahje gávcci muohtaskohtera dahje ATV guovtti jagi áigodagas maid geavaha boazodoalus, iige dárbbaš ovttaháválasdivada daid ovddas máksit. Badjeolbmot sáhttet maid geassit lasseárvodivada dán áigodagas, maiddái go divuhit ja geavahit dáid doaibmafievrrun.
Dál lea viimmat čoavdášuvvan ášši mainna Norgga beale boazodoalu ovddasteaddjit leat jahkeviissaid juo bargan, ja geahččalan oččodit boazodollui seamma eavttuid go eanandollui. Lea ge leamašan ártegis vuohki earuhit eanandoalu ja boazodoalu go lea sáhka divatgeahpádusain.
Divatgeahpádusain čájehit stáhtaeiseválddit dál ahte sis lea dáhttu nannet boazodoalu ealáhussan ja boazodoalu ekonomiija.
Boazodoallit lea diehttelasat dudavaččat dainna. Plassje badjeolmmoš Eva Nordfjell lohká Ávvirii ahte divatgeahpedeapmi dahká álkit árgabeaivvi sidjiide ealáhusas, go ATV ja skohtera haga ii birge. Son lohká dál sáhttit lonuhit doaibmafievrruid dávjjibut, eai ge dárbbaš nu olu ruđa velá lasihit go oastá ođđa vuojána. Doaibmafievrrut gollet hirbmadit jođánit boazodoalus ja eai dain leat olus árvu go fertet lonuhit. Nordfjell lohká beali sin doaibmagoluin mannet doalahit fievrruid ortnegis, divuhit daid ja oastit boaldámuša.
Lea ge oalle illusáhka Norgga boazoealáhussii go dál viimmat Norgga ráđđehus mieđihii ollašuhttit ovtta boazodoalu stuorimus sávaldagain, namalassii divadiid haga beassat skuteriid ja geassevuojániid oastit.
Norgga Boazosápmelaččaid Riikkasearvi lea leamašan hui čielggas dán áššis ahte divatgeahpedeapmi galgá guoskat buohkaide geat vižžet dietnasa boazodoalus. Dan lea sii ožžon eiseválddiid guorrasit, ja ođđa njuolggadusa guoská buohkaide geat leat lasseárvoregistaris ja dinejit eambbo go 50 000 ruvnno boazodoalus.
Dat leage vuoiggaleamos čoavddus dása, go dávjá lea sáhka dušše siidajođiheddjiin. Muhto, ii ovtta siiddas leat dušše jođiheaddji, siiddas leat olu boazobargit geat beaivválaččat atnet vuojániid ealáhusas. Dát ortnet lea rehálaš maiddái sin ektui geain ii leat leamašan dat vuorbi ahte leat ožžon siidaoasi, muhto goitge barget beaivválaččat ealáhusas.