– Vuorjašuvan go gulan loguid
Porsáŋggu gielddas maid lea lassánan mánáidgeafivuođalohku. 2016:s ledje 50 máná geat elle dállodoalus mas lea bissovaš unnán dienas.
Sátnejođiheaddji Aina Borch lea fuolastuvvan, ii ge loga buorren go lassána vaikko gieldda proseantalohku lea mealgat vuolábealde riikka gaskamearálaš logu, 10,3 proseantta.
– Mun vuorjašuvan go gulan loguid. In leat ieš oaidnán loguid, muhto dieđán jagi 2015 loguid. Mánáidgeafivuohta lea ášši mii mu vuorjá, dan sivas go oainnán ahte erohusat lassánit. Mii leat dál bidjan gielddas fokusa áššái. Leat earret eará ráhkadeamen doaibmaáigumuša ja álggahan barggu dan ektui, lohká Porsáŋggu sátnejođiheaddji Aina Borch.
Vuohttá sosiálabušeahtas
Son deattuha ahte dás ii leat dušše ságas bidjat johtui buriid doaimmaid, muhto mihttu lea ahte mánáin galget leat seamma bajásšaddaneavttut.
– Mun oainnán ahte mánáidgeafivuohta lassána ollu gielddain. Mii vuohttit maid bures sosiálabušeahtas ahte ovdamearkka dihtii ássandoarjjaeavttut leat rievdan, dadjá son. Son čujuha ahte ráđđehus lea 2017:s rievdadan ássandoarjjaeavttuid, ja nu váruha vel eambbo dállodolliid šaddat rahčat.
Vuoruha mánáidgeafivuođa
Aina Borch ii loga iežas gieldda rahčamin stuorra bargguhisvuođain, muhto čujuha ahte Porsáŋggus leat olusat bargonávccahisvuođaruđas ja nuorra bargonávccahisvuođaruđas.
– Mánáidgeafivuohta lea juoidá maid áigut vuoruhit boahtteáiggis, loahpaha son.