– Dálki orru hehtten bileahttavuovdima
Midnattsrockena festiválahoavda Jon Arne Pettersen ii loga duhtavažžan bileahttavuovdminiin dán jagáš festivála maŋŋel.
– Dálki orru váikkuhan dán jagáš bileahttavuovdima, muhto dálkki eat sáhte mii mearridit, lohká Pettersen.
Pettersen muitala sis leat dán jagáš festiválalogut, muhto eai almmut daid vuos.
– Mii almmuhit loguid go min bargi, guhte bargá loguiguin, lohká ahte mii sáhttit almmuhit, čilge Pettersen.
Duhtavaččat festiválain
Vaikko lohká ahte sii livčče áinnas háliidan oaidnit eanet gussiid Lavttenjárggas Midnattsrockena vahkkoloahpa, de lea Pettersen buoremielas go festivála ja čađaheapmi manai bures.
Festiválahoavda rámida dán jagáš čadaheami, sihke sin eaktodáhtolaš bargiid dáfus ja buohkaid geat barge festiválas.
– Buot artisttat leat rámpon min festivála, ja visot čájeha ahte lea mannan bures vahkkoloahpas, muitala Pettersen.
Pettersen lasiha ahte festiválas lea čuvges boahtteáigi nu guhká go lea beaivvádat ja fiertu.
– Go dálki lea min bealde, de gal festivála maid láve mannat bures. Ii arvedálkin soaitte olbmuid mielas nu somá vuolgit konsertii, dadjá son.
Boikohtten festivála
Son muitala ahte lea gullan ságaid ahte Leavnnja ássit soitet boikohtten festivála, muhto ii loga diehtit leat go duođat.
– Jus leat duođat dát beaggimat, de lea hui váivi midjiide. Sávan ii leat nu, loahpaha festiválahoavda Pettersen.
vikar3@avvir.no