Sámiid Duodji ii dohkket sámediggedieđáhusa
Sámiid Duoji riikačoahkkimis váldui sámediggedieđáhusa duoji birra ovdan, man Sámiid Duodji ii sáhte dohkkehit.
Riikkaorganisašuvdna Sámiid Duodji (SD) doalai mannan vahkkoloahpa riikačoahkkima Tjeldsundbrua Kro og Hotellas Skániin Romssas. Doppe váldui earret eará sámediggedieđáhus duoji birra ovdan ja riikačoahkkincealkámušas čállá SD ahte sii eai sáhte dan dohkkehit.
Sámediggi ferte duoji ovddidit dássálaga
SD čállá ahte Sámediggi ii fátmmas olles Sámi, muhto dušše unnitlogu das go sámediggedieđáhusas čuožžu ahte Sámedikkis lea mihttu ovddidit duoji boahtteáiggi vejolašvuohtan ja geasuheaddji ealáhussan. SD:I lea dohkketmeahttun ahte Sámediggi ii áiggo ovddidit duoji dássálaga kultuvrrain ja fágalaš oahpuin nu go ovddidit ealáhusa. SD cealká ahte duodji ferte ovddiduvvot buot surggiin.
Buorre gelbbolašvuohta fágalaš oahpu ja kultuvrra birra lea eaktu vai galgá sáhttit duoji seailluhit ealáhussan, cealká SD.
Bivdet duoji biddjot UNESCO listui
SD bivdá Sámedikki buktit ovdan dieđáhusa mas duodji adno kulturárbin ja kulturcaggin, giellacaggin ja fágan.
Riikačoahkkin ávžžuha Sámedikki bargat dan ovddas vai duodji beassá UNESCO máilmmi kulturárbbi listui.