– 90 proseantta čurrot
Suolovuomis šaddet maid luopmánat, dan duođašta duottarstobu jođiheaddji, muhto ain lea beare čurrot.
– Luomi gal šaddá, muhto in jáhke ovdal vahku geahčen čoaggin ládje, muitala Suolovuomi Duottarstobu eaiggát, May-lis Klingan.
Son lohká sáhttit rievddadit jagis jahkái man árrat láddet luopmánat Suolovuomi guovllus, eará vuopmeguovlluid ektui.
– Na sáhttá vahku ja vel guokte vahku ge maŋŋelis. Lea dáhpáhuvvan ahte lea mánu maŋŋelis go eará guovlluin, gos árrat leat álgán lubmet. Dál gal in jáhke eambbo vahku vel, de gal lea čoakkihahti, muitala son.
Klingan ii dieđe manin dál lea nu maŋŋit láddame luopmánat.
– Ártet, vaikke oalle báhkat leamašan. Soaitá gal dat fas ahte ii leat arván ja nu goikkádat, dat soaitá dán jagi maŋidan. Dál beassá goit fargga meahccái vuolgit, lohká son vel loahpas.