– Vuodjenlohpi galgá čuovvut MÁĐIJAID
Ávvir čálii mannan bearjadaga aviissas ahte orohat 17 vuordá vástádusa fylkkamánnis go sii leat sádden fuolladieđáhusa bievlavuodjima birra.
Finnmárkku Fylkkamánni lea geassemánu 14. beaivvi vástidan orohahkii, ja sii leat ávžžuhan orohaga váidit gieldda vuodjenlobi práksisa, jus dat orru boastut leamen orohaga mielas.
– Orohagas lea maid vejolaš váidit siviilaáittardeaddjái, nu go earret eará Luonddugáhttensearvi lea ovdal váidán Guovdageainnu suohkana práksisa, dadjá Anders Tandberg Finnmárkku Fylkkamánni kantuvrras.
Geasehit dávviriid meahccái
Kárášjoga bivdojoavkkut besset vuodjit guovtti máđija mielde, ja ožžot bidjat leairra guovtti báikái bivdoguovllus. Vuodjenlobi lea lohpi addit dušše dan vuođul ahte áigu geasehit leairra ja dávviriid meahccái. Ii leat lohpi olbmuid sáhtostit meahccái.
– Ii leat lohpi eará go ovtta báikái geasehit leairra mohtor- fievrruin. Lea gáržžádus mii dadjá ahte lea lohpi vuodjit ovtta dahje guokte tuvrra ovttain vuojániin, dahje ovtta tuvrra guvttiin vuojániin. Muhtin báikkiin lea váttisvuohta ahte vuddjo lobiheamet ealgabivddu oktavuođas, leat maid muhtimat geat leat ráŋggáštuvvon lobihis vuodjima geažil. Mun in dieđe guoská go dát Kárášjohkii, dadjá Anders Tandberg.
Báhččon ealgga lea lohpi viežžat
Fuođđolága §21 gieldá mohtorfievru geavaheami go áigu ohcat dahje čuovvut ealgga, muhto báhččon ealgga gal lea lohp viežžat ja geasehit ruoktot mohtorfievrruin.
– Juohkehaš gii vuodjá meahcis mohtorfievrruin lea geatnegahtton várrogasvuođain vánddardit, vuodjin sáhttá mielddisbuktit luonddubillisteami. Olmmoš sáhttá ráŋggáštuvvot vaikko lea viežžamin báhččon ealgga, muitala Tandberg.
Stuora erohusat Finnmárkkus
Go suohkan meannuda vuodjenlobi ohcamiid, de sii galget čuovvut lágaid. Go vuodjinlobi addet ealgabivdui, de galgá vuodjenlohpi čuovvut dálá máđijaid.
– Siskkáldasat fylkkas leat stuora erohusat vuodjenlobi meannudeamis. Ovdamearkka dihte lea Fálesnuoris hui garra práksis, earáin fas lea eambbo liberála práksis, ja dađi bahábut soaitá dakkár práksis mii rihkku lága. Go mus eai leat vuodjenlobit dás, de in hálit dál namuhit makkár suohkanat dat leat, loahpaha fylkkamánni bargi Anders Tandberg. roy@avvir.no