Doallan Avvira logi jagi
Ávvir lea šuoddán golbma oskkáldas lohkkiin geat leat doallan Ávvira logi jagi.
Son lea máŋgalot jagi orron Deanus, muhto eret Guovdageainnus, Britt Elin Haetta Isaksen lea álggu rájes doallan Ávvir aviissa ja lohká leamašan dehálaš sutnje ja su bearrašii beassat beaivválaččat lohkat sámegielat aviissa.
– Dehálaš doallat aviissa vai beaivválaččat beassat oaidnit sámegielat čállosiid. Mun in leat čeahppi čállit sámegiela, go logan artihkkaliid de geahččalan muitit. Luohttit ferten ahte Ávviris lea čeahpes giellabargit ja ahte čállibehtet riekta, lohká Ávvir oskkáldas lohkki, Britt Elin Haetta Isaksen.
Doalan buot sámegielat aviissaid
Son ii leat dušše Ávvira doallan dan rájes go vuohččan ilmmai logi jagi dás ovdal, son lea maiddái Áššu ja Min Áiggi doallan ovdal go Ávvir riegádii. Áššu lohká doallan 1993 rájes.
– Sámegiel aviisa lea dehálaš, danin lean doallan Ávvira álggu rájes ja boađán ain doallat dan, lohká son.
Iige son loga ollu rievdadusat leamašan, muhto aviisahámi lohká vuohttán rievdan.
– Lea maiddái šaddan eambbo gelddolažžan maŋŋá go šattai Ávvir, lohká Haetta. Son ii loga váillahit erenoamáš fáttaid, ja rámida ahte Ávvir nagoda dássádit buvttadit sihke kultuvrra, valáštallama ja ođđasiid.
Sávaldat ahte aviisa bissu áin boahtte áiggis
Britt Elin Haetta Isaksenis lea okta sávaldat, dat lea ahte bissu beaivválaš sámegiel aviisan ain boahtte áiggis.
– Soaitá Ávvir lei galgat bidjat eambbo návccaid nuoraid áššiid buvttadit, oažžun dihtii nuoraide beroštumi lohkat Ávvira, dadjá Britt Elin Haetta Isaksen, geas alddis leat nuorat ruovttus. Son muitala plánas lea dál nuorat nieiddain lohkat ovtta artihkkala beaivái, maid sáhttiba digaštallat ja lohkat ovttas.
– Dalle besse humadit sámegiela. Ávvir lea buorre veahkkeneavvu seailluhit sámegiela, oaivvilda Ávvir lohkki Britt Elin Haetta Isaksen.
Buvttada buori ođđasiid
Deatnulaš Solbjørg Ravna lea maid doallan Ávvira dan rájes go ilmmai vuohččan, son lea movtta go lea okta aviisa mii buvttada sámegiel ođđasiid.
– Mu mielas Ávvir buvttada buriid ođđasiid, lea čeahppi válljet ođđasiid. Olmmoš gal dieđusge sávvá čađat duon dán, muhto láve somá lohkat áigeguovdilis áššiid Ávviris, lohká Ravna. Son lasiha ahte Ávvir lea duostil, go goziha sámi servodaga.
– Lea dieđusge nu ahte okta áidna sámegiel aviisa ii nagot buot guovlluid gokčat čađat, muhto jáhkán návccaid vuođul mat Ávviris leat, de geahččalit goit gokčat nu ollu go nákcejit, lohká Solbjørg Ravna. Son lohká doallat aviissa boahtte áiggis.
Golmma gillii buvttadit ođđasiid
Okta sávaldat livčče sus ge Ávvirii boahtte áiggis, ja dat lea ahte aviisa álgá buvttadit muhtin ođđasiid julev- ja máttasámegillii.
– Livččii somá jus dan nagodivčče. Sávan olbmot oidnet man dehálaš Ávvir lea, ja ahte gávdno okta aviisa mii buvttada sámegiel ođđasiid, lohká Ravna.
Čuovun liikká, vaikko áššiide ii leat beroštupmi
Guovvamánu 6. beaivve jagi 2008:s de ostii leavdnjalaš Elen Kirsten Aikio Ávvira ja dan rájes lea son doallan dan. Son ii loga nu duđavaš Ávvira sisdoaluin ja lohká beare ollu ovttageardán ođđasiid, maid sus ii leat beroštupmi lohkat.
– Mu mielas lea beare ollu bohccuid birra, lea dieđusge buorre sidjiide geain lea dasa beroštupmi, muhto mus ii leat dat beroštupmi. Čuovun liikká mielde maid Ávvir čállá, vaikko lea lossat lohkat sámegiela, lohká son.
Eambbo digaštallamat
Elen Kirsten Aikio mielas gal lea aviissa sisdoallu rievdan dan rájes go ilmmai vuohččan, son lohká dál lea eambbo digaštallamat áššiid sisdoaluin.
– Leat sihke buori ja heajos digaštallamat, lohká goalmmát
oskkáldas Ávvir lohkki. Elen Kirsten Aikio ii loga doallan Áššu dahje Min Áiggi.