– Ávvir nanne giela
Sámediggepresideanta Aili Keskitalo lea ilus go Ávvir lea neahtas sámegiel áššiiguin.
– Vuosttažettiin háliidan sávvat eaiggádiidda, bargiide ja lohkkiide lihkusávaldagaid áidna sámegiel aviissain ja logiin jagiin. Munnje lea hui mávssolaš go beasan ođđasiid ja eará áššiid lohkat sámegillii. Dovddan dan dego muhtinlágán skuvladiibmun juohke háve, go dat nanne giela ja sátneriggodaga. Gielalaččat ja giellapolitihkalaččat lea maid hirbmat dehálaš mis lea sámegiel aviisa, dadjá sámediggepresideanta.
Nanne demokratiija
Son dadjá ahte Ávvir lea dehálaš maiddái demokratiija ja servvodatságastallama oktavuođas.
– Lea oalle hástalus sihke praktihkalaččat ja hálddahuslaččat go leat riikkarájit ja maiddái giellarájit Sámis. Danne lea hui dehálaš geahččalit suddjet daid arenaid ja ságastallanforaid mat leat. Anán divrrasin dan barggu mii lea dahkkon dán rádjai.
Ii čága čihkosii
Son lea dieđusge okta sis gean Ávvir jearahallá dávjjimusat. Ii álo leat dat gal nu somá, mieđiha Keskitalo ja bohkosa:
– Nu han politihkkáriid ja mediaid gaskavuohta lea. Muhto ii ábut čiegadit maidege, ii ge čiehkádit. Sámi servodat lea nu unni, dadjala son.
Boahtteáiggis šaddá jáhkkimis digitála fálaldat deháleamos. Maiddái Aili lohká dál áššiid eanas telefovnnas, neahttaduolbbás dahje dihtoris.
– Nu lea dilli dál oallugiin, ja mun lean hui ilus go Ávvir lea ovdánan das ja ain ovdána.
maritelin@avvir.no