Go lea leamaš mielde ollašuhttime Ávvira
Ávvira ovddeš stivrajođiheaddji, Ola Finseth, lea bargan olu dán suorggis, muhto Áššu ja Min Áiggi ovttastuhttimiin lea earenoamáš čeavlái.
Sámegiel aviissat badjel logi jagi dás ovdal, Áššu ja Min Áigi, ilbme guktii vahkkus. Sivvan dasa lei heajos ekonomiija.
Čoavddus ilbmadit sámegiel aviissa máŋgga geardde vahkkui
Ola Finseth, Finnmarkena ovddeš direktevra, lei Min Áiggi stivrras dan áiggi ovdal go Ávvir ilmmai, ja lei mielde ollašuhttime Ávvira ja dasto doaimmai stivrajođiheaddjin dan ođđa Ávviris.
– Sihke dalá Áššu ja Min áigi rahče ekonomiijain go mun evttohin Min Áiggi stivrras geahččalit váldit oktavuođa Áššuin ja oidnen vejolašvuođa ovttastuhttit dán guovtti aviissa vai sáhtášii ráhkadit sámegiel aviissa mii ilbmá dávjjit. Min mielas dat lei eambbo ealaskas ja maid ahte sámi giella han lea ovdáneamen. Boahttevaš buolvvat máhttet lohkat sámegiela vaikko boarrásat soitet ain rahčat dainna. Mii válddiimet oktavuođa Áššuin ja šiehtadalaimet mo galgat bargat dan. Dat manai hui bures, mii šattaimet ovttaoaivilii mo galgat organiseret dan ja olles proseassa manai hui njuovžilit. Hui duhtavaš dainna, čilge Finseth Ávvira duogáža birra.
Aktiiva eaiggát sihke Áššus ja Ávviris
Altaposten lei Áššu mieleaiggát, ja lea eambbo go 20 jagi áŋgiruššan sámi aviisabuvttadeamis. Danne lei lunddolaš Altapostenii vuolgit aktiiva eaiggádin maiddái Ávvirii go dat ilmmai.
– Lea hui dehálaš ahte gávdno sámegiel aviisa mii áimmahuššá sámegielat lohkkiid. Ahte lea vejolaš lohkat ođđasiid ja áigeguovdilis áššiid eatnigillii lea mu mielas hui dehálaš giellagáhttema ektui. Dasa lassin áigot sápmelaččat, nu go earát ge, eambbo vejolašvuođaid, NRK Sámi ja Ságat aviissa sadjái, čilge Altapostena vásttolaš redaktevra, Rolf Edmund Lund, gii lea nubbi guovtti jođiheaddjis.
Preassadoarjja dagahii dan vejolažžan
Vai dát ovttastuhttin galggai leat vejolaš, de lei dárbu eambbo doarjagii.
– Go mihttu lei almmuhit vihtta sámegiel aviissa vahkkui, arvat eambbo go ovdal, de lassánii preassadoarjja sakka. Dan dihte lei ge vejolaš ollašuhttit dan vuolláibáhcaga haga. Mihttu ii lean goasse dinet nu olu ahte aviisii gártá badjebáza. Buot mii bođii plussii, manai fas njuolga ruovttoluotta aviisii, čilge Ola Finseth.
Nordavis/altapostenii, eaiggádiidda, lei maid dehálaš frekveansa lassánit. Danne vuolggahuvvui jurdda almmuhit vihtta aviissa vahkkui, ja dan oktavuođas ákkastallojuvvui maiddái garrasit ahte preassadoarjja galgá lassánit, mii galggai dagahit dán vejolažžan. Lihkus lei politihkalaš dáhttu dasa.
– Mii leat hui ilus go Stuorradikki eanetlohkku oinnii preassadoarjaga dehálašvuođa sámi, mii min mielas lea okta dain deháleamos gielladoaimmain. Vaikko Sámediggi ii leat oassi dás, de lea guovddážis ahte sámi politihkkarat oidnet man dehálaš preassadoarjja lea, lasiha Rolf Edmund Lund.
Rámida Ávvira
– Mu oaidnu lea ahte Ávvir daid maŋemus jagiid lea bargan bures ja mearrediđolaččat addin dihte dehálaš fálaldaga lohkkiide, sihke sisdoalu ja giela ektui. Earenoamáš dehálaš lea go leat šaddan eambbo digitála ja nu maid ođđaáigásaš ja boahtteáigásaš. Rápmi bargiide geat leat bargan buori barggu máŋga jagi, ja maid dehálaš ahte Altaposten eaiggádin ja beaivválaš jođiheamis lea leamaš áŋgir barggus ovdánahttit Ávvira, dadjá Lund.
Čevllohallá go lea oassi dán dehálaš barggus
Finseth lea leamaš dán suorggis badjel 20 jagi, muhto dá lea juoga mainna lea earenoamážit čevllohallá.
– Buot diŋggain dán suorggis de lea Áššu ja Min Áiggi ovttastuhttin okta dain bargguin mainna lean duhtavaččamus ja eanemus čeavlái go lean leamaš oassi das, dadjá son.