– Hukset luoh
Sara Beate Eira Persson lei Ávvira nubbi bissovaš váldodoaimmaheaddji. Son barggai váldodoaimmaheaddjin measta njeallje jagi.
Sara Beate Eira Persson lei nuorra go álggii váldodoaimmaheaddjin. Son lei aiddo deavdán 27 jagi ii ge son lean hárjánan jođiheaddji ovdalaččas. Son lei measta nuoramus bargi doaimmahusas ja lei veaháš balus ja njuoras go álggii bargui.
– Mun ledjen bargan Áššus journalistan guokte geasi ja lei NRK Sámis bargohárjáneapmi, mii bođii ávkin go álgen bargui. Josef Isak Utsi (doaimmahusjođiheaddji) lei eret juste dalle go mun álgen bargui, nu ahte álggus dovden iežan hui akto, muitala Sara Beate.
Olbmuin ii lean luohttámuš
Go Sara Beate álggii bargui, de vásihii son ahte olbmuin ii lean luohttámuš Ávvirii. Son oaččui fuomášumi ahte sus lei stuora bargu vuordimin.
– Mii rievdadeimmet iežamet bargodábiid. Mii garvigođiimet dakkár áššiid maid eará mediat ledje min ovdal čállán. Jurdda- hišgođiimet áigeguovdilis áššiid. Mun muittán earenoamáš bures dan go boazodolliin lei nu buorre luohttámuš midjiide, sii válljejedje midjiide cavgilit boazodoalloáššiid. Mus lei hui buorre dovdu go válljejedje midjiide cavgilit vuosttažin. Lei áddjás bargu oažžut olbmuid luohttevašvuođa. Dat dieđusge sáhttá nu leamaš go mun in lean vuos nu hárjánan doaimmaheaddji, muitala Sara Beate.
Lohkkiid logut
Vuosttaš geardde go Sara Beate oinnii lohkkiidloguid, de Ávvir ii lean massán lohkkiid. Mihttun šattai de ahte lohkkit galge lassánit. Dat maid ii lean álkis bargu go eará mediat han masse lohkkiid.
– Dan seammás go mu vuosttaš jagis lassánedje, orun muitimin, 67 lohkki, de lassánedje Ságat aviisas maid lohkkit. Muhto buot eará mediain njidje lohkkiidlogut dan áigodagas, dadjá Sara Beate.
Lossa beaivvit
Eai lean dušše fiinna beaivvit váldodoaimmaheaddjebarggus. Doppe gárte guhkes ja lossa beaivvit maid. Vuhttogođii ahte Sara Beate ii beassan goassege leat priváhta olmmožin, sus ii lean goassege friddjaáigi.
– Hyš, hyš! die boahtá Ávvir! gullogođii go mun bohten gosa