– In báljo muitte daid losses beivviid
Ánte Bals lei Ávvira vuosttaš váldodoaimmaheaddji. Son barggai Ávvira váldodoaimmaheaddjin beannot jagi, ja dát áigi lea báhcán sutnje somás muitun man son muittaša buriin mielain.
Ledje olu losses beaivvit dan rájes go Áššu ja Min Áigi oktiičaskuiga ja šattaiga Ávvirin, ja Ánte Bals muitá man garrasit sii barge dan ala ahte addit lohkkiide buoret fálaldaga.
Eai diehtán masa manne, muhto aŋkke áigo čađahit
Ánte Bals muitá bures dan earenoamáš vuoiŋŋa mii dagai ahte sii nagodedje dan barggu.
– Ovdamearkka dihte muittán ahte mis lei 2007 čavčča čoahkkin ja okta journalista jearai goas vuosttaš Ávvir ilbmá. Dan eat lean oba jurddašan ge, muhto de dan čoahkkimis beare mearrideimmet «na nu fal, guovvamánu 6. beaivvi, Sámi álbmotbeaivvi, ilbmá vuosttaš Ávvir», muittaša Ánte.
– Dat čájeha veahá dan vuoiŋŋa mii mis lei – eat diehtán masa mannat, muhto liikká áigguimet čađahit dan. Dan láven maŋit áiggi jurddašit buriin mielain. Go leimmet juo mearridan ahte aviissat galget oktiičaskojuvvot, de eat šat ohcan hástalusaid, muhto baicce geahččaleimmet gávdnat čovdosiid, lohká son.
Ii báljo muitte daid losses beivviid
Ánte muitala ahte sis, ovdal ovttasčaskima, lei garra jáhkku ahte dát vissásit nanne sámi mediafálaldaga, ja go lei nu garra jáhkku dasa, de šattai maid vuoigŋa dan mielde. Váldodoaimmaheaddjis ledje olu dovddut ja jurdagat ođđa aviissa birra, ja čohkká dál, logi jagi maŋŋil, buriin dovdduin ovttasčaskima birra.
– Ledje guokte beali mat mearkkašedje olu dalle; okta lei ahte mo min lohkkit ja servodat birra váldá ođđa aviissa vuostá. Nubbi lei dat ahte mo mii siskkaldasat galgat dan oažžut doaibmat. Dál lea logi jagi gollan, ja vaikko dalle ledjege losses beaivvit, de in dál šat báljo muitte daid, muitala Ante.
Buoret fálaldaga lohkkiide
Vuosttaš váldodoaimmaheaddji muitá ahte sis ledje máŋga mihtu maid háliidedje olahit ođđa aviissain. Earenoamážit ledje guokte mihtu hui guovddážis mat galge leat mielde addit buoret fálaldaga lohkkiide.
– Ovdal ovttasčaskima lávii dovdot beare bures jus oktage lei eret, ja nu mis leige okta mihttu ahte journalisttalaččat galggaimet nanosmuvvat. Nubbi lei ahte journalisttat galge beassat eambbo čiekŋudit iešguđet áššiide. Dalle lávii nu ahte ášši olle máŋgii rievdat ovdal go lea fas áigi čállit ášši birra. Nu ii beassan albma ládje čuovvut ášši, ja dat lei mis sávaldat ahte galggai rievdat buoret guvlui, muitala Ante.
Bures lihkostuvvan
Vaikko Ánte heittiige bargamis Ávviris, de lohká son aŋkke oaidnit ahte aviisa lea bures ovdánan dan rájes.
– Go heiten Ávviris beannot jagi maŋŋil ovttasčaskima, de in dovdan heađisge ahte leimmet geargan bargguin. Muhto oainnán ahte aviisa lea maŋŋil joatkán barggu, ja lea huksen geađggi geađggi ala. Aviisa lea ovdánan jagis jahkái, ja lea šaddan olu buorebun aviisan go lei dalle go ledje guokte aviissa, dadjá Ánte. Logi jagi lea gollan dan rájes go Ávvir ilmmai vuosttaš geardde, ja dál leat ge gergosat ávvudit 10-jagi ávvudeami. Ántte mielas lea Ávvir ovdánan bures, ja šaddan dehálaš oassin sámi servodagas.
– Lea somá olggobeal čalmmiiguin oaidnit. Dat buvtta man bláđen juohke beaivvi barggus, buktá mu árgabeaivái lassi árvvu, loahpaha Ávvira vuosttaš váldodoaimmaheaddji, Ánte Bals.