– Álkis bargu stivregoahtit «reaga» mii lei rievttes geainnu alde
Kari Lisbeth Hermansen lea leamaš Ávviris álggu rájes juo, ja son muitá bures ovttasčaskináiggi. Son lea goalmmát ja dálá váldodoaimmaheaddji Ávviris, ja oaidná bures ahte aviisa ovdána.
Go Kari Lisbeth Hermansen álggii doaimmaheaddjin, lei aviisa juo vihtta jagi almmuhuvvon. Aviisa lei oažžugoahtán buori coavcci ja saji sámi mediamáilmmis.
– Lei álkis bargu stivregoahtit «reaga», man ovddes váldodoaimmaheaddjit, Ánte Bals ja Sara Beate Eira leigga rievttes geainnu ala stivren, muittaša Kari Lisbeth.
Eahpesihkkarat mo oktiičaskin doaibmá
Kari Lisbeth lea leamaš Ávviris juo álggu rájes. Ovdal Ávvira áiggi son barggai journalistan Áššu aviissas, ja jotkkii journalistan Ávviris.
– Muittán ahte mii, geat dalle leimmet barggus Áššus, leimmet veaháš eahpesihkkarat mo oktiičaskin doaibmá ja mo min bargodilli šaddá. Lei várra nu ahte buot mii lea ođas sáhttá leat balddihahtti. Juste dat lea leamašan buorren oahppun viidáseappot aviisabarggus, ii ballat rievdademiin ja ođasteamis, lohká Kari Lisbeth.
Olu rievdan guovtti jagis
Go Ávvir lei almmuhuvvon beannot jagi, manai Kari Lisbeth eadnevirgelohpái. Go bođii ruovttoluotta guokte jagi maŋŋil, bargagođii son doaimmahusjođiheaddjin – ja son oinnii ahte olu lea rievdan.
– Álgoáiggiid maŋŋel oktiičaskima lei hui čielga «mii ja dii» oaidnu doaimmahusas; ovddeš Min Áiggi bargit ja ovddeš Áššu bargit. Lei buorre vuohttit ahte dat oaidnu orui jávkagoahtán go bohten fas ruovttuluotta. Dieđusge lei áibbas lunddolaš ahte nu lei álgoáiggiid, go dat váldá áiggi náitit guokte doaimmahusa, guovttelágan bargokultuvrraid heivehit oktii ja bargiide hukset luohttamuša ahte oktiičaskin lea juoga mainna sáhttit lihkostuvvat. Oktasaš dovdu attii buori vuođu bidjat buot návccaid ráhkadit buori aviissa, lohká Kari Lisbeth.
Digitála fálaldagaid nannen
Mediamáilbmi rievdá jođánit, ja Ávvir bargá dál eanet go goasse ovdal ovdánahttin dihte digitála fálaldagaid.
– Maŋemus lávkki válddiimet mannan geasi go almmuheimmet Ávvir+. Dan rádjái leimmet buot neahttaáššiid almmuhan nuvttá. Dat maid gáržžidii man olu ja makkár áššiid mii leat almmuhan neahtas. Journalistihkka ja áššiid ráhkadit máksá ruđaid, eat ge mii ge sáhte min bargiid bargguid nuvttá fállat. Ávvir+ beasaimet min digitála lohkkiide fállat viidát sisdoalu ja maid liigefálaldagaid mat leat várrejuvvon dušše min abonneanttaide, lohká Kari Lisbeth.
Sámi geahčestat ja vuolggasadji
Kari Lisbeth lea rámis dainna buktagiin man Ávvir fállá, ja muitala ahte sii čađat geahččalit bargat buot buoremusa addin dihte lohkkiide buori fálaldaga.
– Mis lea hui čielga journalisttalaš vuođđooaidnu, namalassii ahte mii galgat sámi geahčestagas geahččat áššiid ja dat galgá leat vuolggasadjin buot min bargguide. Mis lea maid mihttun nagodit gokčat stuorát guovlluid Sámis. Stuorámus hástalus lea čađat gaskka geahččalit dahkat nu buori barggu go sáhttit daiguin resurssaiguin mat mis leat, lohká son.
annemaret@avvir.no