Ávvir a-ž
A –Anders J. Bals/ Ánte Bals lei Ávvira vuosttaš váldodoaimmaheaddji. Son barggai 2008-2009 áigodagas. Son barggai maid ovddeš Áššu aviissa doaimmaheaddjin.
Á – Áššu lei nuppi aviissa namma mat 2008:s časkojedje oktii ja ođđa avisa Ávvir de almmuhuvvui.
B – Berit Marie Lise Eira lea Ávvira neahttadoaimmaheaddji. Son virgáduvvui dán virgái 2017:s ja lea vuosttaš geas dát virgi lea Ávviris.
C – Cealkinfriddjavuohta, diehtojuohkinfriddjavuohta ja prentenfriddjavuohta leat demokratiija vuođđoelemeanttat. Friddja ja sorjjasmeahttun preassa lea demokráhtalaš servodaga deháleamos ásahusaid searvvis.
Č – Čielga giellaválljen: Ávvira váldogiella lea sámegiella. Mis, Ávviris, leage maid ovddasvástádus, mii ii leat eará aviissain, namalassii leat mielde seailluheames čálalaš sámegiela.
D – Deaddileapmi dáhpáhuvvá Álttás, lea Polaris Trykk mii deaddila báberaviissa.
Đ – ođasaviisa - Ávvir lea sámegiel aviisa mii ilbmá viđa geardde vahkkus. Mii almmuhit báberaviissa, eaviissa, neahttaaviissa ja mobilaviissa.
E – Eaiggádat: Sámi Aviisa AS stuorámus oasuseaiggádat leat Nordavis AS (33.55 %), Finnmark Dagblad (33.55 %), Indre Finnmark Investeringsselskap (11.5 %), Norgga Boazosápmelaccaid Riikkasearvi (11,18 %)
F – Freelancečállit dahje luođđobargit leat dehálaččat, sin vehkiin olahit viidát ja nagodit máŋggabealat sisdoalu fállat.
G – Guovvamánu 6. beaivvi 2008 almmuhuvvui vuosttaš Ávvir. Vuosttaš jahkebeali almmuhuvvui aviisa golmmma geardde vahkkus.
Beaivválaš aviisan šattai Ávvir borgemánu 12. beaivvi 2008 rájes.
H – Hástálus lea oktolágán. Ávvir lea máilmmi áidna sámegiel beaivválaš ođasaviisa. Lea somá dainna čevllohallat, muhto dat ii lea álki leat oktolágánin. Mii gilvalit stuora mediaásahusaiguin digitála máilmmis mii ovdána jođánit. Dat ii leat álo nu álki go min fálaldat lea sámegillii ja majoritehtagielaide gávdnojit vaikko man olu iešguđetlágán mediafálaldagat.
I – Interneahtas ja neahttasiidduin avvir.no olahit mii lohkkiid viidát ja miehtá Sámi. Njukčamánu 2015 almmuheimmet mii ođastuvvon avvir.no siiddu ja leat dan rájes beaivválaččat iđđedis eahkedii almmuhan áššiid dan siiddus.
J – Journalisttat ja doaimmahus leat aviissa váibmu. Journalisttalaš bargoproseassaid bokte čohkkejit dieđuid ja ovdanbuktit daid čálálaččat, govaid bokte, filmma ja jiena bokte neahtas ja báberaviissas.
K – Kari Lisbeth Hermansen lea dál váldodoaimmaheaddji. Son álggii virgái suoidnemánu 2013.
L – Lohkkit leat sii geaid gudni lea go aviisa dál beassá ávvudit 10 jagi ávvudeami.
M – Min Áigi lei dan nuppi aviissa namma mat 2008:s časkojedje oktii ja ođđa avisa Ávvir almmuhuvvui.
N – Nordsletta, Svein doaimmai váldodoaimmaheaddjin dan rájes go Ánte Bals heittii (2008) dassážii go Sara Beate Eira Persson álggii (2009).
Ŋ – mediamáŋggabealátvuohta lea dehálaš doaibmi demokratiijas. Máŋggalágán mediat lea mávssolaččat servodatdigaštallama, demokratiija ja giela seailluheami ja ovdánahttima dáfus.
O – Ovddasvástádus seailluhit ja ovdánahttit sámegiela.
P – Preassadoarjja lea Sámi Aviissa AS stuorámus sisaboahtogáldu. Mii oažžut jahkásaččat birrasii 15,6 miljovnna ruvnno sámi preassadoarjjan.
R – Reginiussen, Arne lea Ávvira stivrajođiheaddji. Stivrras čohkkájit muđui: Irene Andersen, Marianne Balto Henriksen, Yngve Reginiussen ja Nils Johan Vars.
S – Sara Beate Eira Persson lei Ávvira nubbi váldodoaimmaheaddji, son barggai áigodaga 20092013.
Š – Šurrat olbmuiguin ja gávdnat áššiid mat gusket olbmid árgabeaieallimii lea dehálaš oassi min barggus. Lea min vuoigatvuohta juohkit dieđuid das mii dáhpáhuvvá servodagas ja fuomášahttit moaittehahtti diliid.
T – Tor Sara lea álggu rájes leamašan Ávvir aviissa beaivválaš jođiheaddji. Beaivválaš jođiheaddji bargá hálddahusas, iige guoskka doaimmahusbargguide.
Ŧ – Ŧ, ž, š ja eará sámegiel bustávat dagahit dávjá hástálusaid digitála máilmmis, muhto mii atnit daid árvvus eat ge hálit daid lonuhit eret.
U – Utsi, Josef Isak lea álggu rájes leamašan doaimmahusjođiheaddji ja lea okta dain bargiin gii lea guhkimus bargan Ávviris.
V – Vars, Laila Susanne evttohii nama «Ávvir» ođđa aviisii.
Z – ceavzin ja ovdáneapmi lea ollasit dan duohken ahte mii nagodit ráhkadit sisdoalu mas lohkkit beroštit.
Ž – ražastit ráhkadit buriid ja miellagiddevaš áššiid daiguin návccaiguin mat mis leat, lea vuođđun min bargguide.