RÁPPÁRAT LÁVKEBA Ávvira ávvukonseartta lávdái
Guokte sámi beakkán ráppára lávkeba lávdái go Ávvir ávvuda 10-jagi.
Goappašat ráppárat leaba beaggán viidát. Oanehaččat sáhttá dadjat Kevin André Boine birra, ahte sus lea gullevašvuohta Detnui ja son beaggigođii 2015:s, go beasai mielde Tv2:ža lávlungilvui «Norske Talenter».
Diibmá son almmuhii ođđa singel skearru «Telefon», muhto dovdoseamos dáidá sus «Drømmeland», mii lea rávdnjejuvvon badjel gávcci millijovnna háve Spotify musihkkaneahttabáikkis.
Ailu Valle
Ailu Valle lea Ohcejogas eret. Son ráppe davvisámegillii, suomagill ii ja eaŋgalasgillii. Valle almmuhii vuosttaš skearru 2012:s, man namma lea «Dušši dušše duššat».
Son lea ožžon ollu fuomášumi iežas erenoamáš jietnageavaheami dihte. Dehálaš fáddá Vallii lea cuiggodit oarjemáilmmi nealggi golahit eanet, ja riggáid dárbbu dinet eambbo ja eambbo ruđa. Son čievččasta ge iežas politihkalaš teavsttaiguin kapitalismma njuolga njeacce vuostá.
Valle lea lávlon eanaš sámi stuorra lávddiid alde, earret eará Riddu Riđu lávddis.
– Álggahit veaigekonsearttain ja loahpahit eahketkonsearttain
Soai boahtiba ge Ávvira 10 jagi ávvukonsertii mii lágiduvvo Guovdageainnus borgemánu 24. beaivvi. Ávvukonsearta lágiduvvo ovttas Guovdageainnu Thon Hoteallain. Ávvira váldodoaimmaheaddji Kari Lisbeth Hermansen illuda ávvudit ovttas sámi álbmogiin.
– Mii álggahit ávvudeami veaigekonsearttain ja loahpahit eahketkonsearttain. Ávvukonseartta lávdái galget veaiggi ja eahkeda mielde lávket čieža sámi artistta lassin váldoartisttaide. Mii sávvat ahte konseartaprográmmas lea juoga juohke ovtta miela mielde, lohká váldodoaimmaheaddji.
Nuvttá buot Ávvira abonneanttaide
Hermansen muitala ahte veaigekonsearta lea nuvttá buot Ávvira abonneanttaide.
– Abonneanttat, geain ii leat vejolašvuohta boahtit konsertii, bovdejuvvojit čuovvut doaluid njuolggosáddagis mii sáddejuvvo avvir.no siiddus, lohká Hermansen.
«Liekkadandoaluide»
Konsertii lea maid vejolaš oastit bileahta.
– Muhto ovdal konseartta bovdet mii iežamet lohkkiid searvat «liekkadandoaluide» stuora lávus olggobealde hotealla. Doppe lágidit iešguđetlágán gilvvuid ja fállat herskkuid, dadjá Kari Lisbeth Hermansen.
Loahpas sávvá vel Ávvira váldodoaimmaheaddji ahte nu oallugat go vejolaš sin lohkkiin bohtet konsertii dahje čuvvot veaigekonseartta njuolggosáddaga.
isak@avvir.no