Biehttalan sivalažžan áššáiduhttima vuođul
Áššáiduhtton almmái čuoččuha dáhpáhus galgá leat dáhpáhuvvan go várjalii iežas.
Politiijat ožžo bearjadat iđit diibmu 07.30 dieđu ahte lea dáhpáhuvvan roavva veahkaválddálašvuohta Anárjoga guovllus Kárášjogas. Áššáskuhttineiseváldi jurista Karoline Johansen, Finnmárkku politiijaguovllus, muitala áššáiduhttin almmái lea miehtan háldogiddagassii njeallje vahkkui.
– Son lea dovddastan dagu, muhto ii ráŋggáštussiva. Son čuoččuha iežas gádjun lea sivva dagus, lohká Johansen.
Háldogiddagassii njealji vahkkui
Politiijat leat áššáiduhttán albmá go galgá geahččalan nuppi olbmo goddit, Nuorta-finnmárkku diggegoddi ii lean dasa ovttaoaivilis. Áššáiduhtton almmái lea biddjon háldogiddagassii njeallje vahkkui go galgá leat roavva rumašskáidnema dahkan nuppi olbmui. Son lea háldogiddagasas go galgá leat rihkkon ráŋggáštusparagráfa 274.
– Politiijat oaivvildit ahte son lea geahččalan nuppi olbmo goddit, muhto jus dan eavttu eai olat, de aŋkke lea sáhka roavva rumašskáidnemis. Diggi ii dohkkehan bidjat su háldogiddagassii dan vuođul go lea geahččalan god- dit nuppi, muhto baicce rumašskáidnema vuođul, čilge Karoline Johansen.
Gažadan áššáiduhtton albmá
Karoline Johansen muitala sii leat gažadan áššáiduhtton albmá, muhto ii loga háliidit dađi eambbo čiekŋudit mii galgá leat dáhpáhuvvan báikkis bearjadat iđit.
– Mii leat ain dutkamin ášši, ja áigut gažadit albmá eambbo. Mii eat hálit almmuhit mii galgá leat dáhpáhuvvan, lohká son.
Galgá leat fallehan ákšuin nuppi albmá
Dáhpáhus lei muhtin astoáigge- barttas guovllus, gos muhtin viđátlot jahkásaš almmái navdo leat fallehan nuppi sullii seamma ahkásaš albmá ákšuin. Karoline Johansen muitalii bearjadaga ahte sii navdet su leat geavahan ákšu ja dearppastan nuppi albmá oaivái.
– Mii navdit áššáiduhtton albmá leat máŋgii dearpalan ákšuin gillájeaddji oaivái. Dan vuođul lea áššáiduhtton geahččalan goddit nuppi, muitalii áššáskuhttineiseválddi jurista Karoline Johansen bearjadaga Ávvirii.
Stabiila
Gillájeaddji sáddejuvvui bearjadaga Sea King mielde Davvinorgga universitehtabuohccevissui UNN:I Tromsii.
– Veahkaválddálašvuođa oktavuođas lea almmái bahuid roasmmohuvvan. Maŋemuš diehtu buohcceviesus lea ahte albmá dilli lea stabiila, lohká Karoline Johansen.
Eat ožžon ságaide
Ávvir ii leat lihkostuvvan oažžut áššáiduhtton albmá bealušteaddji ságaide ovdal ášši manai deaddileapmái. Gillájeaddjái ii leat vel nammaduvvon veahkkeadvokáhta.