Buorre jurdda ráhkadit luossatráhpaid
Guovdageainnu Olgešbellodaga, Nils H. Henriksen, evttoha otná Ávviris lohkkiidreivves, ahte huksejuvvojit luossatráhpat sihke Kárášjoga ja Iešjoga gierragiidda mat leat Guovdageainnu suohkanráji siskkobealde. Son oaivvilda dainna oččošii luossanáli lassánit Kárášjogas ja Iešjogas ja Deanus. Dan dihte oaivvilda Olgeža politihkkar, ahte dán guovtti luossajoga luossanálit dárbbašit ođđa gođđobáikkiid badjin Kárášjogas ja Iešjogas. Henriksen maid dadjá dárbbašlažžan hukset luossaveajehiidda šaddadanrusttega, gos besset váldit meađđema ja guovssa «deanuluosas» ja luossaveajehiid bidjat Kárášjoga ja Iešjoga johkagierragiidda. Go luossa lea leamaš mearas, de dat máhccá fas dan báikái gos dat vulggii. Go de lea huksen luossatráhpaid, de luosas leat sullii 150 km ođđa gođđobáikki.
Ovdal lea maid Guovdageainnu Olgešbellodaga bealis ovddiduvvon gáibádus, ahte guovdageaidnulaččat galget maid oažžut hálbbiduvvon oaggongoarttaid , go Deanočázádaga gierragat álget Guovdageainnu suohkanis. Dasa leat gal sihkke Deanus ja Kárášjogas dovddahan vuostehágu. Juste daid gažaldagaid fertejit čielggadit jus šaddá áigeguovdilin hukset guokte luossatráhpa, go de hal lea áibbas lunddolaš ahte guovdageaidnulaččat ožžot seamma rivttiid go kárášjohkalaččat ja deatnulaččat. Soaittášii dál juo áigi dan dahkat, vaikke eai dáidde nu beare galle luosa dál joavdat jogaide mat lea Guovdageainnu suohkana siskkobealde.
Dieđus lea dárbu kártet ja guorahallat ahte leat go oba ge lunddolaš gođđobáikkit bajabealde daid gorssaid gosa Olgešbellodaga politihkkar árvala hukset luossatráhpaid. Easka dalle sáhttá álgit hupmat luossatráhpaid birra, jus gávdnojit buorit gođđobáikkit bajimus osiin Deanočázádaga gierragiin. Iešalddis gal orru dat hui buorre jurdda, go lea lunddolaš ahte mađi eambbo gođđosajit, de dađi eambbo luosat šaddet. Muhto go rahppojit hálbbiduvvon oaggongoarttat maiddái guovdageaidnulaččaide, de dieđus lassanit maiddái oaggut Deanočázádahkii. Dasto han lea jearaldat, ahte lea go ávki luossatráhpain luossanállái. Dasa dieđus ii gávdno vástádus.
Liikká lea dat duohtavuohta ahte Deanočázádaga luossabivddut leat hejot hálddašuvvon, earenoamážit gillá dan geažil Iešjoga luossanálli. Juste Iešjohka lea ge Deanočázádaga stuorra luosaid deháleamos gođđojohka. Buot ođđa jurdagat mot buoridit luossašaddama leat buorit, ja soaitá buorre goansta hukset luossatráhpaid vai luosaide šaddet ođđa gođđobáikkit.
Iešalddis gal orru dat hui buorre jurdda, go lea lunddolaš ahte mađi eambbo gođđosajit, de dađi eambbo luosat šaddet.