Miellačájáhus sisabahkkemiid vuostá
ANÁR: Njoammilguoikkas Anáris lágiduvvo gaskavahku miellačájáhus Jiekŋameara ruovdemáđija ja industriijalaš eanageavaheami vuostá sihke luonddu ja boazodoalu bealis. Miellačájáhusa gohčodit «Boahttevuođa bealis» ja dan lágida Suoma Sámi Nuorat -searvi. Dohko bohtet maid guovllu bálgosiid, Sámedikki, Sámiráđi, Suohpanterror-joavkku ovddasteaddjit ja Greenpeace-searvvi ja eamiálbmotaktivisttat Kanadas ja Aotearoas.
Miellačájáhus lágiduvvo Juvdujoga Njoammilguoikka goađi luhtte gaskavahku diibmu 17-19, čállá YLE Sápmi.