Márkomeanus ođđa buvttadeaddji – ja festiválajođiheaddji
Márkomeanus lea ođđa beaivválaš jođiheaddji/festiválabuvttadeaddji ja ođđa festiválajođiheaddji.
– Stian Pedersen váldá badjelasas doaimma beaivválaš jođiheaddjin/ festiválabuvttadeaddjin ja Aili Guttorm álgá festiválajođiheaddjin, dieđiha Márkomeannu festivála preassadieđáhusas.
Stian Pedersen lea Gáivuonas Romssa fylkkas eret. Son lea maŋimuš jagiid bargan aktiivvalaččat Riddu Riđus, mas váldodoaibman lea leamaš buvttadeapmi.
Aili Guttorm lea Kárášjogas eret, muhto dáid áiggiid lea sus ruoktu Mossas. Son lea oahppan industriála hábmen- ja mašiidnainšenevra.
Vuođđaárvvu áimmuhuššojuvvot
– Mii illudat ovttasbargui! Mii jáhkkit ahte min vuođđoárvvut áimmahuššojuvvojit, muhto maiddái ahte beassaba ieža váikkuhit festivála, cealká Márkomeannu preassadieđáhusas.
Pedersen lea áibbas varas Márkomeanus, muhto lea gearggus ođđa hástalusaide;
– Illudan sakka, ja illudan ođđa hástalusaide hui gelddolaš barggus. Dan ahte festivála deavdá 20 jagi 2019:s jo muitala man dehálaš festivála lea – ja makkár mearkkašupmi das lea Sámis. Mun áiggun bargat dan ala vai Márkomeannu ain movttiidahttá áŋgiruššat, hirpmahuhttá ja ahte galgá leat deaivvadanbáikin olles Sápmái, dadjá Pedersen.
Gearggus ođđa hástalusaide
Guttorm lea ovdal leamaš virgáduvvon čávajođiheaddjin, ja lea gearggus ođđa hástalusaide ođđa rollas:
– Illudan bargagoahtit festiválajođiheaddjin, ja sávan ahte Márkomeannu galgá leat dat báiki gosa olbmot vulget deaivvadit ustibiiguin fas, guldalit musihka, boagustit ja dovdat ilu váimmus, lohká Guttorm preassadieđáhusas.
20 jagi ávvudeami
– Márkomeanus lea earenoamáš buorre čáva geat leat bargan dáinna máŋggaid jagiid, ja moai illudetne sakka bargagoahtit singuin. 2019:s lea Márkomeanus 20 jagi ávvudeapmi, ja mii áigut dieđusge gudnejahttit ávvudeaddji. Justa mo ii muitaluvvo vel gal, muhto sáhkkiivuohta ja hutkás duddjonnákca leat guokte dehálaš čoavddasáni, loahpaheaba Pedersen ja Guttorm.
kari@avvir.no