Guollelihkuin vuittiiga skeaŋkakoarttaid
Geassi lea nohkan, ja dál vuorbádit mii Ávviris mannan geasi oaggungilvvu vuitiid.
Ávvir lea mannan geasi maid, nu go ovddit gesiid ge, lágidan oaggungilvvuid iežamet lohkkiide. Oallugat leat searvan, ja dál mii leat ge vuorbádan vuitiid gilvui mii loahpahuvvui borgemánu 5. beaivvi diibmu 24:00.
Guokte luohká
Oaggungilvvus ledje guokte luohká: Luossagonagas dahje -dronnet ja Guollelihkku. Daidda sáhtte min lohkkit searvat dan bokte ahte lasihit gova min neahttasiiddus, ja deavdit dieđuid guoli birra.
Vuosttaš luossa dolgevuokkain
Buohkat geat serve Luossagilvui ledje mielde vuorbádeamis mas vuoitu lea skeaŋkakoarta – ja dál leat mii vuorbádan vuoiti. Vuoiti lea Mads Mienna! Son gottii 12,4 gilosaš luosa Álttájogas mainna searvvai gilvui, ja Mads muitaliige Ávvirii geasset ahte lea vuosttaš luossa maid son lea dolgevuokkain goddán.
Áidna luosain vuittii
Go Ávvir jearrá vel go Mads Mienna lea šaddan eambbo oaggut mannan geasi, vástida son ná:
– He-he. Mun gal duohta in leat oba šaddan ge fitnat jogas šat maŋŋel dien tuvrra, nu ahte dát lei nu áidna luossa man mannan geasi lean goddán, lohká son.
Dát luossa gárttaige hirbat gánnáhahttin – go dasa lassin go juo lei stuora vuoitu goddit luosa, de lea Mads dál vel šaddan 5000 ruvdnosaš skeaŋkakoartta vuoitin.
20 grámmasaš guliin vuittii
Golmmajahkásaš Mihkkal Máhtte Gaino Sokki fas lei Ránežis geasseluomus go go gottii guoli mainna searvvai Ávvira Guollelihkkugilvui. Dál lea son vuorbáduvvon 1500 ruvdnosaš skeaŋkakoartta vuoitin.
– Oba somás telefuvdna dá gal lei! Man somá ahte vuittii, lea Mihkkal Máhte eatni, Lene Monica Gaino, reakšuvdna go Ávvir riŋge muitalit vuoittu birra.
– Jáhkán dá lei vuosttaš guolli maid goasse lea goddán. Skeaŋkakoartta gal fertet geavahit sutnje oastit ođđa oaggunávdnasiid, go juo guliin vuittii, lohká Mihkkal Máhte áhčči Aslak Sokki.
Guoktelogiovtta oasseváldi
Guollelihku gilvui sáhtte buot gaskal 2- ja 13-jahkásaččat searvat, ii ge lean eaktu makkár guliin serve. Juohke vahkus vuorbáduvvui vuoiti – mas juohke vuoiti oaččui oaggunstákku ja Ávvira buffa. Ollislaččat leat guoktelogiovtta oasseváldi searvan Guollelihku gilvui – ja dá leat sii geat leat vuorbáduvvon vahkkovuoitin geasi mielde:
Sara Mariell Anti
Mia Maren Eira Karlsen
Luossagonagas Mads Mienna
Luossagilvui sáhtii searvat dušše luosain. Eaktun lei ahte luossa galggai goddon 2018 luossabivdoáigodagas, ja galggai goddon vuokkain. Gilvu lei sidjiide geat leat gaskal 13- ja 100-jahkásaččat, ja son gii dieđihii losimus guoli, oaččui gaibagahpira mas čuožžu Ávvir Luossagonagas, dahje -dronnet jus lea nissonolmmoš. Ávvira Luossagonagas dahje -dronnet gilvui searvvai dušše Mads Mienna, ja nu šattaige son dán jagáš Luossagonagassan. Ávvir sávvá hui olu lihku buot vahkkovuitiide, ja maiddái Mads Miennai ja Mihkkal Máhtte Gaino Sokkii – geat vuittiiga stuora árvosaš skeaŋkakoarttaid.