Luossabivdit leat gergosat STEVDNET stáda diggái
Deanočázádaga luossabreavaeaiggádat leat gergosat stevdnet stáda diggái, go čuoččuhit Deanosoahpamuša lobiheapmin.
Deanočázádaga luossabreavaeaiggádiid advokáhta guovttos, Benny Solheim ja Hans Arne Nysaeter, Hegg & CO AS advokáhtafitnodagas, boahtiba čállit stevdnemis earrer eará, ahte stáhta lea geatnegahtton heaittihit šiehtadusa mii dahkkui gaskal Norgga ja Suoma čakčamánu 30. beaivvi 2016 jagis, ja álggahit ođđa šiehtadallamiid Suomain.
Duogáš
Stevdnemis mii lagamus beivviid sáddejuvvo Sis-finnmárkku diggegoddái čujuhuvvo earret eará dasa, ahte geassemánus 2016:s šadde departemeantadásis ovttaoaivilii ođđa soahpamuššii. Stuorradiggái ovddiduvvui soahpamuš mas bivde Stuorradikki dohkkehit ođđa Deanosoahpamuša. Stuorradikki energiija- ja biraslávdegoddi meannudii diibmá ášši, muhto doppe hilggui eanetlohku soahpamuša. Aŋkke go ášši meannuduvvui Stuorradikki dievasčoahkkimis, de dohkkehii eanetlohku soahpamuša.
Stuorradikki eanetlohku dohkkehii
Advokáhta guovttos čujuheaba ge stevdnemis dasa go Stuorradikki energiija- ja biraslávdegoddi hilggui soahpamuša daid ákkaiguin, ahte ráđđehus ferte álggahit ođđa šiehtadallamiid, ja dán háve fertejit šiehtadallamiin beassat mielde Deanočázádaga vuoigatvuođalaččat sihke Norgga ja Suoma bealde.
Dan aŋkke ii dorjon Stuorradikki eanetlohku vaikke stuorradiggelávdegoddi lei dáhtton bálkestit Deanosoahpamuša. 59 stuorradiggeáirasa led-
je mielas Deanosoahpamuššii ja 49 áirasa jienastedje vuostá.
Guovddážis báikkálaš vuoigatvuođat
Stevdnemis šaddá ge guovddáš fáddán ahte rihkku go soabaduvvon šiehtadus báikkálaš bivdovuoigatvuođaid Deanočázádagas. Sis-finnmárkku diggegottis boahtá luossabreavaeaiggádiid searvi, mii ovddasta 250 vuoigatvuođalačča, čuoččuhit ahte Deanosoahpamuš rihkku sihke sisriikka- ja riikkaidgaskasaš riektenjuolggadusaid máŋgga sajis.
Dasto bohtet čuoččuhit rihkkumiid nu duođalažžan, ahte stáhta lea geatnegahtton heaittihit Deanosoahpamuša ja vaikke soahpat ođđa soahpamuša mii váldá vuhtii sihke sisriikka- ja riikkaidgaskasaš rivttiid.
Dáid osiid ákkastit
Deanočázádaga luossabreavaeaiggádiid searvi čuoččuha Hegg & CO AS advokáhtaid bokte ahte stáhta lea rihkkon dáid osiid:
√ Báikkálašolbmot eai beassan doarvái bures leat mielde proseassain main olis dahkkui šiehtadus Suomain, man geažil leat rihkkon sihke sisriikka- ja riikkaidgaskasaš rivttiid maid stáhta lea geatnegahtton čuovvut.
√ Báikkálašolbmuid bivddus leat erenoamáš riektesuodjaleapmi. Go guolásteapmi galgá gáržžiduvvot čázádagas, de lea čielggas ahte báikkálaš guolásteapmi galgá unnit gáržžiduvvot go muđui bivdu. Soahpamuš Suomain gáržžida báikkálaš bivddu eambbo go bođu olbmuid bivddu. Dat rihkku sihke sisriikka- ja riikkaidgaskasaš rivttiid. Soahpamuš gáržžida báikkálaš olbmuid guolásteami nu garrasit ahte masset vejolašvuođa doaimmahit johkakultuvrra.
√ Šiehtadusa geažil lea ilbman ođđa «vuoigatvuođalaččaid joavku» go olggobeale bartaeaiggádiidda addet vuoigatvuođaid bivdit seamma dásis go báikkálaš olbmuin lea, nu ahte dat rihkku sisriikka- ja riikkaidgaskasaš rivttiid.
√ Šiehtadus ásaha vuogi mas sáhttá leat váikkuhus guolástan hálddašeapmái. Šiehtadus gáržžida nu ollu báikkálašolbmuid rievtti hálddašit guolásteami čázádagas, ahte rihkku sihke sisriikka- ja riikkaidgaskasaš rivttiid.
Riikkaidgaskasaš konvenšuvnnat
Stevdnemis čujuhuvvo earret eará ILO-169 konvenšuvdnii ja ONkonvenšuvdnii SP artihkkala 27 mas daddjo miellahtut minoritehtas eai galgga «biehttaluvvot» rievtti doaimmahit earret eará iežaset kultuvrra.
Hegg & CO AS advokáhttafitnodaga advokáhtat árvvoštallet ahte diggi ádjána vahkku.