– In ádde man alde áigot diggogoahtit
Deanučázadaga Luossabivdosearvvi ovddeš nubbijođiheaddji, Svein Nordsletta lohká áddetmeahttumin go luossabivdosearvvit áigot stevdnet stáhta.
– Sii dadjet massán vuoigatvuođaid, muhto ii han oktage leat massán vuoigatvuođaid. Bivdu lea gáržžiduvvon, ja ii oktage leat massán vuoigatvuođaid. Jus Kárášjogas Leavvajohkii biddjo leahttorádji 50 km/d, de it masse vuoigatvuođa vuodjit Kárášjogas Leavvajohkii, muhto leahttu gáržžiduvvo, dadjá Nordsletta.
Luossanáli birra jurddašit
Svein Nordsletta geassádii Deanučázadaga Luossabivdosearvvi stivrras guovtti vai golmma jagi áigi dassái. Son muitala ahte searvi ii šat heiven sutnje, go searvi bargagođii cakkadit bivdogáržžideami.
– Mun gal in ádde man alde áigot diggogoahtit, go luossanálli han ferte mannat ovdalii vuoigatvuođaid. Mun gal in jáhke dies šaddat diggeášši, go muhtin lea massán moadde jándora luossabivddu. Go luossanálli lassána, de mii sáhttigoahtit fas jurddašišgoahtit mannat ruovttoluotta dasa, luoitit 40.000 turista fas bivdit, dadjá Nordsletta.
Otná luossabivdonjuolggadusat Deanučázadagas leat doaibman diimmá rájes.
– Dát njuolggadusat mat dál leat, gal fertejit bistit vel máŋga jagi ovdal go bohtosat oidnogohtet. Mu mielas lea badjel-bávtti hommá álgit stevdnet stáhta. Luosa birra han lea sáhka, ii ge ovttage vuoigatvuođaid. Buohkat geat leat firpmiin bivdán, besset ain bivdit ja seamma sii geat bivdet stákkuin, dadjá Nordsletta ovdal go lasiha ahte son ii ádde dien Čearretsullo áššis ge ulbmila.