Boŋggu Ántte viđat skearru lea gárvvis
Boŋggu Ánte lea 2015 rájes bargan ođđa skearruin, ja dál lea almmuhan «Luonddus» skearru. Das leat 27 luođi ja njealji luođis lea vel musihkka.
– Dat fal lea dábáláš CD. Ieš lean goit hui duhtavaš. Dál lea gelddolaš gullat movt olbmot dan váldet vuostá, dadjá hárjánan ja beakkán juoigi Boŋggu Ánte.
Luođit olu sogain
Boŋggu Ánte lea «Luonddus» skearrus ieš ráhkadan ovcci luođi, ja dat eará luođit leat árbevirolaš luođit. Son gudnejahttá sin geaid juoigá ja sin maŋisbohttiid. Ulbmilin lohká leat seailluhit luđiid vai eai jávkka.
– Dán skearrus leat luođit sihke Guovdageainnu oarjja-, nuorttabealde ja gasku, ja vel muhtin Kárášjogas nai, dadjá Ánte.
– Muhto in mun dás gille namuhit ovttage nama dahje makkár luđiide lea biddjon musihkka. Gal dan gullá skearrus, mojohallá son.
Eamit fárus
Sus lea maid veahkkejuoigi mielde skearrus, iežas eamit, Marit Gunhild Bongo, ja soai dat juoigaba fárrolaga ovtta dain musihkkaluđiin. Musihka dan njealji luohtái leaba Per William Hermansen ja Birkir L Jullum ráhkadan. Skearru olggoža lea Anne Gro Gaup ráhkadan.
Fargga beannot čuođi luođi Cd:in
Boŋggu Ánte lea ovdal juoigan ja almmuhan vihtta skearru, ja leat gártan oktiibuot 144 luođi. 36 luođi lea ieš komponeren, ja 13 dain lea musihkka vel. Dat njeallje skearru mat ovdal leat almmu- huvvon, leat; «Náššá», «Dolin», «Sámi álbmot» ja «Boŋggu Ántte 4. skearru». Son lea maid oassálastán eará Cd:in. Sámi álbmot luohti lea almmuhuvvon «Dolin» CD:S 2002:s, ja dasa biddjui vel musihkka «Sámi álb- mot» Ep:i mii almmuhuvvui 2007:s.
Olu almmuhan ja olahan
Boŋggu Ánte lea máŋgga almmolaš ásahussii maid ráhkadan luđiid, nu go Diehtosiidii, Heiafesti- válii, Kanáda álgoálbmot Tvfitnodahkii APTN:I ja maid Guovdageainnu beassášmárkaniidda. Son lea oassálastán Sámi Grand Prixas ja vuittii juoiganoasi1996:s. Son lea ollu doallan konsearttaid Sámis ja eará báikki- in Norggas ja olgoriikkas. 2003:s oaččui son maid Áillohašbálkkašumi.